अन्नदाता मन ले करे सबो वादा होही पूरा: श्री भूपेश बघेल

मुख्यमंत्री ह कौही के ऐतिहासिक शिव दरबार म करिन पूजा-अर्चना

रायपुर, मुख्यमंत्री श्री भूपेश बघेल ह आज दुर्ग जिला के ग्राम कौही (पाटन) म आयोजित कार्यक्रम ल सम्बोधित करत कहिन के अन्नदाता मन ले करे सबो वादा राज्य सरकार कोति ले पूरा करे जाही। उमन कहिन कि मुख्यमंत्री के रूप म शपथ लेहे के तुरते बाद मैं ह केबिनेट के बैठक म मुख्यमंत्री के रूप म पहली दस्‍कत किसान मन के करजा माफी के फैसला म करे हंव। किसान मन ले 2500 रूपिया प्रति क्विंटल के मूल्य म धान खरीदी बर राशि के प्रावधान आगामी बजट म करे जाही। मुख्यमंत्री ह कहिन के छत्तीसगढ़ 2500 रूपिया प्रति क्विंटल के दर ले धान के खरीदी करइया देश के पहली राज्य होही।

मुख्यमंत्री श्री भूपेश बघेल ह एखर पहिली कौही स्थित धर्मस्थली आनंद मठ मंदिर पहुंचके मां काली अऊ प्रसिद्ध ऐतिहासिक शिव मंदिर म पूजा अर्चना करके राज्य के सुख-शांति अऊ समृद्धि के कामना करिन। मुख्यमंत्री ह इहां आयोजित गरिमामयी संक्षिप्त कार्यक्रम ल सम्बोधित करत क्षेत्रवासी मन के प्रति आभार प्रकट करिन। उमन कहिन कि पाटन क्षेत्र के ऐतिहासिक महत्व रहे हे। क्षेत्र के बहुत अकन वीर मन ह आजादी के लड़ाई म महत्वपूर्ण योगदान देहे हें। पाटन क्षेत्र शिक्षा के क्षेत्र म शुरू ले ही अग्रणी रहे हे। ए क्षेत्र के पूर्वज मन म शुरू ले सामाजिक-राजनीतिक चेतना रहे हे।

मुख्यमंत्री श्री बघेल ह कार्यक्रम म कहिन के प्रदेश के गांव मन ल विकसित करके इहां रहइया गांव-गरीब-मजदूर-किसान अउ कम आमदानी वाले मनखे मन के आय म बढ़ोत्तरी करे के हर संभव प्रयास करे जाही। उमन नदी अऊ नरवा के पानी ल खेत मन तक पहुंचाए के जरूरत बताईन। उमन कहिन कि कोठार अऊ गौठान मन ल घलोक सुविधापूर्वक बनाना होही। गांव मन म गोबर के जैविक खाद बनाए के संगेच गोबर गैस बनाके घरो-घर तक पहुंचाना होही। मुख्यमंत्री ह कहिन के सरकार के प्राथमिकता गांव मन के विकास करना हे। पशु मन के नस्ल सुधार के संग देशी नस्ल के पशु मन ल बढ़ावा देना हे, जेखर से प्रदेश म दूध के उत्पादन म बढ़ोत्तरी हो सकय। ए अवसर म स्थानीय जनप्रतिनिधि, जिला पंचायत अउ जनपद सदस्य, ग्राम पंचायत मन के पदाधिकारी अउ बड़ संख्या म ग्रामीण उपस्थित रहिन।

लउछरहा..