आर्यभट्ट विज्ञान अउ वाणिज्य शिक्षण प्रोत्साहन योजना म प्रवेश बर आवदेन आंमत्रित

धमेन्‍द्र निर्मल के सार समाचार, शिक्षा सत्र 2019-20 म अनुसूचित जाति अउ जनजाति वर्ग के विद्यार्थी मन बर आर्यभट्ट विज्ञान अउ वाणिज्य शिक्षण प्रोत्साहन योजना के अंतर्गत विज्ञान अउ वाणिज्य शिक्षण केन्द्र जिला दुर्ग (कन्या) अउ बालक जगदलपुर म चिभिक वाले विद्यार्थी मन के प्रवेश खातिर आवेदन आंमत्रित करे गे हे। कार्यालय आयुक्त आदिम जाति अउ अनुसूचित जाति विकास विभाग इन्द्रावती भवन रायपुर, डाहर ले ये संबंध म प्रदेश के जम्मो सहायक आयुक्त आदिवासी विभाग ल चिट्ठी भेजे गे हवय।



सहायक आयुक्त आदिवासी विभाग बेमेतरा श्रीमती मेनका चन्द्राकर ह बताइन कि वछर 2018-19 के 12 वीं बोर्ड परीक्षा परिणाम घोषित होए के पीछू प्रदेश के अनुसूचित क्षेत्र (टी.एस.पी.एरिया) म रहइया अनुसूचित जाति-जनजाति के विद्यार्थी मन खातिर आर्यभट्ट विज्ञान अउ वाणिज्य शिक्षण केन्द्र जिला दुर्ग अउ जगदलपुर म चिभिक लेवइया विद्यार्थी मन खातिर प्रवेश के कार्यवाही करे जाही। विभाग के सहायक आयुक्त ह जिला के जम्मो बी.ई.ओ. बेमेतरा, साजा, बेरला अउ नवागढ़ अउ जिला के जम्मो छात्रावास अधीक्षक मन ल भेज के विकासखण्ड अउ गाँव गँवई म चलत जम्मो शासकीय हायर सेकेण्ड्री स्कूल मन म प्रचार – प्रसार करके पात्र विद्यार्थी मन के आवेदन पत्र पूर्ण रूप ले भरवाके सहायक आयुक्त कार्यालय बेमेतरा म लउहे उपलब्ध कराए के निर्देश देहे हावय। ताकि निर्धारित बेरा म आवेदन दुर्ग अउ जगदलपुर कार्यालय ल प्रेषित करे जा सकै।


चटकारा
बाबू:- एमा कतेक झन ल लेना हे साहेब, दू झिन मोरो लइका हावय, कोनो कोन्टा ले एहू मन ल बुलकाना रिहिसे।
साहेब:- अरे ! तेंह फारम भर ल भरवाए के काम कर न, कौरव – पाण्डव ले बाँच जही तेन डिगरी ह एकलव्य के होथे। ए तो तइहा ले चले आवत हे बइहा।

लउछरहा..