करजा माफी अऊ धान के समर्थन मूल्य बाढ़े म गांवों गांव म खुशी के लहर

कृष्णा प्रसाद, पुनऊ राम अऊ मनी राम ल मिलही एक लाख रूपिया ले जादा खेती के करजा राशि के माफी
किसान मन ल कामन धान बर प्रति क्विंटल 450 रूपिया अऊ ए ग्रेड धान बर प्रति क्विंटल 430 रूपिया जादा मिलही ए पईत

गरियाबंद, मुख्यमंत्री श्री भूपेश बघेल कोति ले खेती के करजा माफी अऊ प्रति क्विंटल धान के समर्थन मूल्य 2500 रूपिया करे के घोषणा ले जिला के किसान मन म खुशी के लहर हे। ए संबंध म विकासखण्ड गरियाबंद के ग्राम अंदोरा के रहवासी 45 वर्षीय श्री कृष्णा प्रसाद उपाध्याय ह कहिन के प्रदेश म नवा सरकार कोति ले किसान मन के हित म लेहे गए दुनों निर्णय के स्वागत हे। ए निर्णय मन ले गांव के सबो किसान अड़बड़ खुश हें। गांव म मनखे मन के बीच अभी करजा माफी अऊ समर्थन मूल्य ह चर्चा के विसय बने हे। उमन कहिन के जऊन दिन खेती के करजा माफी के राशि किसान मन के खाता म आ जाही, ओ दिन किसान मन के खुशी अऊ बाढ़ जाही। श्री उपाध्याय ह बताइस के ऊंखर तिर 10 एकड़ खेती के जमीन हे अऊ उमन ए सत्र म फसल उत्पादन बर एक लाख 10 हजार रूपिया खेती के करजा लेहे हें। ओ मन ए सत्र म अभी तक 70 क्विंटल धान बेचइया हें। शासन के घोषणा के अनुसार ए पईत उंखर एक लाख 10 हजार रूपिया के खेती के करजा माफ होही अऊ प्रति क्विंटल धान के समर्थन मूल्य 2500 रूपिया के हिसाब ले धान के बिक्री ले ओ मन ल करीबन 32 हजार रूपिया के अकतहा लाभ घलोक होही।
विकासखण्ड छुरा के ग्राम मुरमुरा निवासी 76 वर्षीय पुनऊ राम साहू ह घलोक खेती के करजा माफी म अपन प्रसन्नता जाहिर करे हें। उमन बताइन के ऊंखर पास साढ़े ग्यारह एकड़ खेती हे अऊ किसान क्रेडिट कार्ड के माध्यम ले ग्रामीण बैंक पाण्डुका ले उमन डेढ़ लाख रूपिया के करजा लेहे हें। श्री पुनऊ राम अब तक 126 क्विंटल धान उपार्जन केन्द्र म बेचे हें, अभी ओ मन ल 16 क्विंटल धान अऊ बेचना हे। समर्थन मूल्य बाढ़े ले ओ मन ल ए साल 64 हजार रूपिया के अकतहा लाभ मिलही अऊ डेढ़ लाख रूपिया के खेती के करजा घलोक माफ हो जायेगा। श्री पुनऊ राम साहू मुरमुरा ग्राम पंचायत के उप सरपंच घलोक हे। उमन बताइस के मुख्यमंत्री श्री भूपेश बघेल कोति ले खेती के करजा माफी अऊ समर्थन मूल्य बढ़ाय के घोषणा ले गांव म खुशी के लहर हे। ए उदीम ले हर किसान ल राहत मिलही अऊ माफ के गइस राशि अउ धान के जादा राशि के उपयोग ज्यादातर किसान खेती-किसानी ल आगू बढ़ाय बर ही करहीं।

ग्राम बेंदकुरा के श्री मनी राम साहू ह घलोक प्रसन्नता जाहिर करत बताइस के ए साल उमन अपन 12 एकड़ खेती के जमीन म खेती-किसानी बर के.सी.सी ले एक लाख पांच हजार रूपिया नगद अऊ 15 हजार 325 रूपिया के खाद ले रहिन। उमन ए सत्र म अब तक करीबन 3 लाख 95 हजार रूपिया के धान (करीब 192 क्विंटल धान) उपार्जन केन्द्र म बेच हें। समर्थन मूल्य बाढ़े ले ए साल धान बेंचे ले ओला 86 हजार रूपिया के अकतहा लाभ मिलही अऊ एक लाख 95 हजार रूपिया खेती के करजा ले राहत मिलही। ए प्रकार ओला करीबन दू लाख 80 हजार रूपिया के अकतहा फायदा होही। मनी राम ह बताइस के बेंदकुरा म करीब चार सौ घर हे, जेमां के दू-तीन कुटुंब ल छोड़के पूरा गांव के मनखे खेती-किसानी करत हे अऊ समर्थन मूल्य बाढ़े ले पूरा गांव खुश हे।

हम आप ल बता देवन के छत्तीसगढ़ शासन के सहकारिता विभाग कोति ले मंत्रालय महानदी भवन अटल नगर रायपुर ले 19 दिसम्बर के दिन जारी आदेश के अनुसार प्रदेश म स्थित सहकारी बैंक अउ छत्तीसगढ़ ग्रामीण बैंक म जम्‍मो किसान मन के 30 नवम्बर 2018 तक के अल्पकालिन खेती के करजा ल माफ करे के निर्णय ले गए हे। आदेश म लिखे गए हे के 1 नवम्बर 2018 ले 30 नवम्बर 2018 के बीच लिकिंग या नगद के रूप म चुकाये करजा के राशि के माफी हो सकत हे।
खेती के करजा के संबंध म गरियाबंद म जिला सहकारी केन्द्रीय बैंक के नोडल अधिकारी श्री धनराज पुरबिया ले मिले जानकारी के मुताबिक गरियाबंद जिला म पांच तहसील – गरियाबंद, फिंगेश्वर, छुरा, मैनपुर अउर देवभोग के अंतर्गत 34 हजार 500 किसान मन ल 107 करोड़ 53 लाख 43 हजार रूपिया अल्पकालीन खेती के करजा देहे गए रहिस। अइसनहे लीड बैंक अधिकारी मन ले मिले जानकारी के मुताबिक ग्रामीण बैंक ले जिला म 12 शाखा के अंतर्गत 4777 किसान मन ल 29 करोड़ 38 लाख रूपिया के.सी.सी. करजा देहे गए हे। ए प्रकार से जिला म सहकारी केन्द्रीय बैंक अऊ ग्रामीण बैंक के माध्यम ले 39277 किसान मन ल करीबन 136 करोड़ 91 लाख रूपिया खेती के करजा देहे गए हे। श्री पुरबिया ह बताइस के भारत सरकार कोति ले धान कामन (मोटा धान) बर प्रति क्विंटल 1750 रूपिया अउ ग्रेड ए धान (पतला धान) बर 1770 रूपिया प्रति क्विंटल समर्थन मूल्य निरधारित हे। ए समर्थन मूल्य के अलावा राज्य सरकार कोति ले किसान मन ल प्रति क्विंटल 300 रूपिया के हिसाब ले बोनस घलोक दे जात रहिस, जबकि अभी हाल सरकार कोति ले प्रति क्विंटल धान के समर्थन मूल्य 2500 रूपिया करे म किसान मन ल धान कामन बर प्रति क्विंटल 450 रूपिया अउ ए ग्रेड धान बर प्रति क्विंटल 430 रूपिया अकतहा लाभ होवत हे।

लउछरहा..