कर्जामाफी अऊ धान के मूल्य म बढ़ोतरी के फैसला ले किसान मन म खुशी के लहर

जिला म 96 हजार 671 किसान मन ल 396.42 करोड़ के करजा माफ
एक लाख 35 हजार 521 किसान मन ल मिलही धान म प्रति क्विंटल 2500 रूपिया

बलौदाबाजार, राज्य सरकार कोति ले धान के मूल्य प्रति क्विंटल 2500 रूपिया अऊ किसान मन के कर्ज माफी के ऐतिहासिक निर्णय ले जिला के किसान मन म खुशी के लहर हे। जिला म 96 हजार 671 किसान मन ल 396.42 करोड़ के करजा माफ करे जाही अऊ एक लाख 35 हजार 521 किसान मन ल धान के प्रति क्विंटल 2500 रूपिया मिलही। ग्रामीण इलाका के किसान मन म राज्य सरकार के ए निर्णय के असर देखतेच बनत हे। सबो किसान सपरिवार धान मिसई के काम म लगे हें। जिला मुख्यालय के नजदीक के ग्राम मगरचबा के आदिवासी किसान श्री राम लाल कंवर, श्री घनाराम पैकरा अऊ नरोत्तम पैकरा ह सरकार के ए फैसला के स्वागत करत कहिन के किसान मन के हित म लेहे गए ये निर्णय ले हम सब उत्साहित हवन। धान के बढ़े कीमत मिले ले हमर आमदनी बाढ़ही। अइसनहे इहां के किसान श्री बालाराम ह बताइस के उमन खाद, कीटनाशक आदि बर बीस हजार रूपिया के कर्जा ले रहिन। ओ मन ल चिंता रहिस के ये करजा ल चुका पाहीं के नहीं। फेर करजा माफी ले ओ मन ल राहत मिले हे। ओखर मानना हे के कर्जा के बोझ म डूबे किसान मन ल राज्य सरकार ह बहुत बड़ सहारा दे हे जेखर लिए ओ मन सब सरकार ल दिल ले धन्यवाद देवत हें। जिला म अब तक 01 लाख 03 हजार 521 किसान मन के पंजीयन हो चुके हे अऊ अब तक 54 हजार किसान मन ले 23 लाख 30 हजार 212 क्विंटल धान खरीदी करइया हे। जेमां ले मोटा धान 68 हजार 512 क्विंटल, पतला धान 02 लाख 34 हजार 568 क्विंटल अऊ सरना 14 लाख 12 हजार 242 क्विंटल हे। इही प्रकार जिला के 96 हजार 671 किसान मन ल 396 करोड़ 42 लाख रूपिया के करजा माफी के फायदा मिलही।

लउछरहा..