किसान मन के समृद्धि ले ही बाजार मन म आही रौनक: श्री भूपेश बघेल

मुख्यमंत्री के नागरिक मन ह ककरिन अभिनंदन

रायपुर, मुख्यमंत्री श्री भूपेश बघेल ह कहिन हे के किसान मन के समृद्धि ले ही देश अऊ राज्य म खुशहाली अउ बाजार मन म रौनक आही। छत्तीसगढ़ के खजाना के एक-एक पाई के उपयोग प्रदेश के जनता के हित म करे जाही। राज्य सरकार ह जऊन वादा करे हे ओ मन ल खच्चित पूरा करे जाही। श्री बघेल आज राजधानी रायपुर के मोवा मोहल्ला म ओव्हरब्रिज के तीर आयोजित अभिनंदन समारोह ल सम्बोधित करत रहिन।
उमन कहिन कि राज्य सरकार ह किसान मन के 6100 करोड़ रूपिया के करजा माफी अऊ 2500 रूपिया प्रति क्विंटल के दर ले धान खरीदी के अपन वादा उपर अमल शुरू कर देहे हे। श्री बघेल ह कहिन के छत्तीसगढ़ देश के पहला राज्य हे, जिहां किसान मन ल हमर सरकार ढाई हजार रूपिया प्रति क्विंटल के दर ले धान के कीमत देवत हे। श्री बघेल ह कहिन कि किसान मन के समृद्धि ले ही राज्य अऊ देश म खुशहाली आही। किसान मन तीर कहूं पइसा आही त ओखर से ग्रामीण अर्थव्यवस्था मजबूत होही अऊ बाजार मन म घलोक रौनक आही। उमन कहिन के समाज के सबो वर्ग के भागीदारी ले छत्तीसगढ़ के विकास होही। समारोह ल वन, गृह अऊ पर्यावरण मंत्री श्री मोहम्मद अकबर अउ नगर निगम रायपुर के महापौर श्री प्रमोद दुबे संग श्री विनोद तिवारी ह घलोक सम्बोधित करिस। समारोह म खेल अऊ युवा कल्याण मंत्री श्री उमेश पटेल, विधायक सर्वश्री सत्यनारायण शर्मा, विकास उपाध्याय अऊ कुलदीप जुनेजा घलोक उपस्थित रहिन।

लउछरहा..