रायपुर, गढ़बो नवा छत्तीसगढ़ छायाचित्र प्रदर्शनी म दर्शक मन ल प्रदेश के इतिहास, राज्य सरकार कोति ले समावेशी विकास बर करे जात उदीम अऊ विकास कोति लउहे आगू बढ़त छत्तीसगढ़ ल जाने समझे के अवसर मिलत हे। रायपुर के टाउनहॉल म आयोजित प्रदर्शनी देखे अवइया दर्शक मन ह ये विचार व्यक्त करत हें। प्रदर्शनी के चौथइया दिन आज रायपुरा स्थित शिवोम विद्यापीठ के पढ़ईया लईका मन संग कई मनखे मन ह प्रदर्शनी देखिन अऊ सहराइन।
प्रदर्शनी देखे आए चांपा के तहसीलदार डॉक्टर राम विजय शर्मा ह कहिन कि इहां छत्तीसगढ़ के सांस्कृतिक अऊ प्रेरणादायक इतिहास के झलक मिलत हे। छात्र-छात्रा मन ह कहिन कि इहां आके छत्तीसगढ़ के जुन्ना स्मरणीय तथ्य अऊ ज्ञानवर्धक बात मन के बारे म पता चलिस, जेला जानके हम गौरवांवित हन। छात्र आयुष गौतम ह कहिस कि हमार मुख्यमंत्री ह कम समय म अदभुत काम करे हे, जेखर से प्रदेशवासी मन ल लाभ मिले हे। उमन मुख्यमंत्री ल धन्यवाद देवत कहिन कि ओ ह आगू घलोक अइसनहे काम करत रहय। श्री अनिकेत झा ह कहिन के छत्तीसगढ़ म नवा सरकार ह बहुत कम समय म कड़ा मेहनत ले अच्छा काम करे हे, जेखर सुखद परिणाम दिखाई देवत हे। मनखे मन ल रोजगार के नवा अवसर उपलब्ध कराए बर उमन श्री भूपेश बघेल ल धन्यवाद दीन। शिक्षक श्री टुपेन्द्र साहू ह कहिन कि प्रदर्शनी ले हमला बहुत से महत्वपूर्ण जानकारी मिले हे, जऊन ल मैं आन मनखे मन तक पहुंचाहूं जेखर से जादा ले जादा मनखे मन ल लाभ मिल सकय।
