जेम पोर्टल के जगह सीएसआईडीसी ले शासकीय विभाग मन म होही सामान खरीदी : श्री भूपेश बघेल

उद्योगपति मन के सुझाव ले बनाये जाही राज्य के नवा उद्योग नीति प्रदूषण रहित उद्योग मन ल मिलही प्राथमिकता
मुख्यमंत्री ह करिस 19वां राष्ट्रीय उद्योग-व्यापार मेला के उद्घाटन

रायपुर, मुख्यमंत्री श्री भूपेश बघेल ह कहिन हे के छत्तीसगढ़ म जेम (गवर्नमेंट ई मार्केटिंग) पोर्टल के जघा छत्तीसगढ़ राज्य औद्योगिक विकास निगम (सीएसआईडीसी) के माध्यम ले शासकीय विभाग मन म सामान खरीदी करे जाही। एखर बर अगला केबिनेट म प्रस्ताव लाए जाही। उमन काल बिलासपुर म 19वां राष्ट्रीय उद्योग अउ व्यापार मेला के उद्घाटन करत ये घोषणा करिन।

मुख्यमंत्री श्री बघेल ह कहिन के नवा उद्योग नीति 2019 बर उद्योगपति मन अपन सुझाव देवव। ऊंखर सुझाव के मुताबिक ही नवा नीति बनाये जाही। उमन कहिन के आन राज्य मन के उद्योग नीति म जऊन अच्छा बात हे, ओ मन ल प्रदेश के उद्योग नीति म सामिल करे जाही। उमन कहिन के कोयला अऊ लोहा के अकतहा कृषि अउ सब्जी आधारित अउ प्रदूषण रहित उद्योग मन ल प्राथमिकता देबोन। सरकार के मंशा हे के स्थानीय उद्योग मन के संगेच बाहिर ले अवइया उद्योगपति मन ल घलोक राज्य के नीति ले प्रोत्साहन मिलय, जेखर से रोजगार के जादा ले जादा अवसर बढ़य। कार्यक्रम म उपस्थित उद्योग मंत्री श्री कवासी लखमा ह कहिन के नौजवान मन ल रोजगार के जरूरत हे। सरकार ओ मन ल छोटे-छोटे उद्योग स्थापित करे बर प्रोत्साहित करही अऊ जऊन सुविधा अऊ मांग उंखर तरफ ले आही वोला पूरा करे के उदीम करे जाही।

बिलासपुर के विधायक श्री शैलेष पांडेय ह ए अवसर म कहिन के मेला के आयोजन शहर बर गौरव के बात हे अऊ एखर ले छोटे-छोटे उद्यमी मन ल लाभ मिलही। आयोजक मन कोति ले स्वागत भाषण देवत छत्तीसगढ़ लघु अउ सहायक उद्योग संघ के अध्यक्ष श्री हरीश केडिया ह छत्तीसगढ़ के छोटे उद्यमी मन ल कइसे प्रोत्साहित करे जा सकत हे, ए बारे म सुझाव देहे अऊ उद्यमी मन के समस्या मन के तरफ ध्यान आकृष्ट कराइन। कार्यक्रम म राजस्व अउ आपदा प्रबंधन मंत्री श्री जय सिंह अग्रवाल, विधायक डॉ. विनय जायसवाल अऊ डॉ. रश्मि सिंह ठाकुर, उद्योग विभाग के बहुत अकन वरिष्ठ अधिकारी अऊ उद्योग संघ के पदाधिकारी अउ गणमान्य नागरिक बड़ संख्या म उपस्थित रहिन।

लउछरहा..