बाबा गुरू घासीदास के नाम म गिरौदपुरी म खोले जाही गुरूकुल शिक्षा केन्द्र : श्री भूपेश बघेल

बाबा के बताए रद्दा म चलके करबोन छत्तीसगढ़ के सर्वांगीण विकास: मुख्यमंत्री
नवनिर्वाचित विधायक मन के सम्मान समारोह

रायपुर, मुख्यमंत्री श्री भूपेश बघेल ह तपोभूमि गिरौदपुरी धाम म बाबा गुरू घासीदास के नाम म गुरूकुल शिक्षा केन्द्र खोले के घोषणा करे हें। श्री बघेल ह कहे हें के छत्तीसगढ़ के नवा सरकार बाबा गुरू घासीदास के बताए रद्दा म चलके छत्तीसगढ़ ल विकसित राज्य बनाही। बाबा गुरू घासीदास के संदेश हमर सरकार बर काम करे के मार्गदर्शी आधार होही। मुख्यमंत्री आज गिरौदपुरी म छत्तीसगढ़ प्रगतिशील सतनामी समाज कोति ले आयोजित अनुसूचित जाति के नवनिर्वाचित विधायक मन के सम्मान समारोह ल मुख्य अतिथि के आसंदी ले सम्बोधित करत रहिन। श्री बघेल ह सतनाम पंथ के धर्मगुरू मन अऊ राजमहंत मन के संग गुरू गद्दी म मत्था टेकिन अऊ राज्य के समृद्धि अऊ खुशहाली बर आशीर्वाद मांगिन। ए मौका म धर्मगुरू बालदास साहेब, लोक स्वास्थ्य अउ यांत्रिकी मंत्री गुरू रूद्रकुमार, शहरी विकास अउ श्रम मंत्री श्री शिव डहरिया, उद्योग मंत्री श्री कवासी लखमा अऊ जादा शिक्षा मंत्री श्री उमेश पटेल घलोक उपस्थित रहिन।

मुख्यमंत्री श्री भूपेश बघेल ह समारोह म कहिन के नवा सरकार ल लेके जनता म काफी उत्साह हे। ये राज्य के पहली अइसन सरकार हे, जेमां छत्तीसगढ़ के सबो वर्ग के भागीदारी हे। राज्य सरकार ह पहिली निर्णय किसान मन के हित म लेहे हे। किसान मन के करजा माफ करे के संग धान के खरीदी 2500 रूपिया म होए लगे हे। बाबा के बताए रद्दा म चलके ही गांव मन के विकास करना हे। गौ-संवर्धन ल बढ़ावा देना हे। बाबाजी ह मंझनिया के तपत गर्मी म बइला मन ल नांगर म नइ फांदे के उपदेश देहे हें। ओ मन जीव-जन्तु ल होवइया कष्ट ल घलव जानय अऊ ऊंखर प्रति प्रेम करत रहिन। राज्य सरकार घलोक गरूआ अऊ घुरवा के संरक्षण बर प्रतिबद्ध हे। गांव मन म चरान बर अलग से ददहान विकसित करे जाही जेमा गाय-गरू ल भरपेट भोजन मिल सकय।

मुख्यमंत्री श्री बघेल ह कहिन के राज्य सरकार शराबबंदी बर वचनबद्ध हे, फेर एला बंद करे बर समाज म जागरूकता लाके अऊ सहमति बनाके निर्णय ले जाही। समाज खुद शराब के बुराई मन ल समझही अऊ रोके बर आघू आही। श्री बघेल ह कहिन के राज्य के जनता के नवा सरकार ले बिक्‍कट आशा हे। घोषणा पत्र म हमन जऊन वादा करे हवन, ओ सबो ल पूरा करबोन। बाबा गुरू घासीदास के आशीर्वाद ले हम सबो घोषणा मन ल पूरा करे म सक्षम होबोन। समारोह ल नगरीय प्रशासन अउ विकास मंत्री डॉ. शिव डहरिया ह घलोक सम्बोधित करिन। स्थानीय विधायक श्री चंद्रदेव राय ह स्वागत भाषण दीन। उमन बाबा के तपोभूमि म गरीब लइका मन के गुणवत्तापूर्ण शिक्षा बर गुरूकुल शिक्षा संस्थान खोले के मांग करिन। उमन किसान मन के कर्जमाफी अऊ 2500 रूपिया म धान खरीदी निर्णय बर मुख्यमंत्री श्री भूपेश बघेल के प्रति आभार प्रकट करिन। मुख्यमंत्री श्री भूपेश बघेल ह ए मौका म छत्तीसगढ़ प्रगतिशील सतनामी समाज के तरफ ले अनुसूचित जाति वर्ग के नवनिर्वाचित विधायक अऊ मंत्रि मन के सम्मान करिन। एमां मंत्री श्री शिव कुमार डहरिया, मंत्री श्री गुरू रूद्रकुमार, विधायक बिलाईगढ़ श्री चंद्रदेव राय, विधायक डोंगरगढ़ श्री भुनेश्वर बघेल अऊ विधायक नवागढ़ श्री गुरूदयाल बंजारे सामिल हे। ए अवसर म धर्मगुरू युवराज खुशवंत साहेब, कसडोल विधायक सुश्री शकुन्तला साहू, जिला कलेक्टर श्री जे.पी.पाठक, एसपी श्री प्रशांत अग्रवाल संग बड़ संख्या म प्रदेश भर ले आए सतनामी समाज के राजमहंत, पदाधिकारी अऊ समाज के मनखे उपस्थित रहिन। प्रगतिशील छत्तीसगढ़ सतनामी समाज के अध्यक्ष श्री एल.एल. कोसले ह आभार प्रकट करिस। मुख्यमंत्री संग अतिथि मन के परम्परागत पंथी नर्तक दल ह शानदार स्वागत करिस।

लउछरहा..