भक्कम अकन अवैध माल पकड़ाइस चुनाव के बेरा म

जब्तशुदा माल म लगभग 1.55 करोड़ ले जादा के 1.24 लाख लीटर अवैध शराब,
6.17 करोड़ ले जादा के वाहन, लैपटाप आदि सामिल
रायपुर, राज्य विधानसभा के आम चुनाव बर चलत प्रक्रिया के बेरा म अवैध राशि, अवैध शराब अऊ आन जिनिस मन के गैर-कानूनी परिवहन अउ अवैध कारोबार के खिलाफ निर्वाचन आयोग कोति ले पूरा प्रदेश म सघन जांच अभियान सरलग चलत हे। मुख्य निर्वाचन पदाधिकारी श्री सुब्रत साहू खुदे कई ठन जिला मन म जाकर लेहे गय समीक्षा बैठक मन के बाद जिला स्तर म अधिकारी मन ह जांच अउ छापामार अभियान अऊ जादा तेज कर देहे हे। आदर्श चुनाव आचार संहिता के उल्लंघन कोनो स्थिति म झन होए पाए एखर खातिर जिला निर्वाचन अधिकारी मन कोति ले गठित निरीक्षण के टीम अऊ छापामार दल सरलग दौरा करत हे।
सघन जांच अऊ छापामार अभियान के तहत प्रदेश म अब तक 12 करोड़ 50 लाख 89 हजार 779 रूपिया के अवैध जिनिस जब्त करे गये हे, जेमा चार करोड़ 47 लाख रूपिया नकद राशि सामिल हे। मुख्य निर्वाचन पदाधिकारी कार्यालय के अधिकारी मन ह काल संझा प्रदेश के कई ठन जिला मन ले संकलित सूचना मन के उल्लेख करत बताइस के काल दिन भर चले कार्रवाई म पुलिस कोति ले जब्त -35 लाख 78 हजार रूपिया के चार फोर-व्हीलर, एक इलेक्ट्रॉनिकी आटो-रिक्शा अऊ दू टू-व्हीलर घलोक जब्त हे। छापामार कार्रवाई अऊ चेकिंग अभियान म 17 नवंबर के दिन आबकारी विभाग कोति ले 260 किलोग्राम मउहा संग एक फोर-व्हीलर अऊ दु टू-व्हीलर ल जब्त कर ले गीस, जेकर कुल कीमत चार लाख 35 हजार रूपिया आंकी गए हे। अधिकारी मन के मुताबिक 17 नवंबर के दिन पुलिस अऊ आबकारी के उड़न दस्ता मन से कुल 40 लाख 18 हजार रूपिया ले जादा के सामान जब्त करे गे हे। ए सबला मिलाके प्रदेश भर म चुनाव प्रक्रिया के बेरा अब तक 6 करोड़ 17 लाख 52 हजार रूपिया के वाहन, लैपटाप, प्रेशर कुकर अऊ साड़ी आदि के जब्ती करे गए हे। एखर अलावा 17 नवंबर के दिन 53 हजार 516 लीटर अवैध शराब घलोक जब्त करे गीस, जेकर कीमत करीबन 24 लाख 99 हजार रूपिया हे।
अधिकारी मन ह बताइन के एला मिलाके प्रदेश भर म निर्वाचन प्रक्रिया के बेरा म अब तक करीबन एक करोड़ 55 लाख 35 हजार रूपिया के एक लाख 24 हजार 324 लीटर अवैध शराब घलोक 17 नवंबर तक जब्त करे गए हे। नारकोटिक्स मामला मन म 17 नवंबर तक 22 किलोग्राम ले जादा मादक द्रव्य बरामद करे गे हे, जेकर अनुमानित कीमत एक लाख 76 हजार रूपिया हे।अधिकारी मन ह बताइन के ए दौरान पुलिस ह तीन करोड़ 77 लाख 13 हजार 358 रूपिया अऊ आयकर विभाग ह 70 लाख रूपिया के अवैध नगदी जब्त करे हे। ये मां आयकर विभाग कोति ले राजधानी रायपुर के दु व्यापारिक प्रतिष्ठान मन ले छै नवम्बर के दिन जब्त 50 लाख अऊ 13 नवम्बर के दिन जब्त 20 लाख रूपिया के नगदी सामिल हे।

लउछरहा..