मुख्यमंत्री कुम्हारी के गुरू घासीदास जयंती समारोह म

रायपुर, मुख्यमंत्री श्री भूपेश बघेल ह आज संझा राजधानी रायपुर के नजदीक कुम्हारी म नगर पालिका परिषद के तरफ ले आयोजित गुरू घासीदास जयंती समारोह म करीबन आठ करोड़ 09 लाख रूपिया के निर्माण काम मन के भूमिपूजन करिन। ये अवसर म मुख्यमंत्री श्री भूपेश बघेल ह कुम्हारी म नगर पालिका परिषद कोति ले आयोजित गुरू घासीदास जयंती समारोह म मनखे मन ल सम्बोधित करिन। श्री बघेल ह कहिन कि छत्तीसगढ़ के महान संत अऊ समाज सुधारक गुरू बाबा घासीदास ह सबो मनखे मन ल सत्य अऊ अहिंसा के मारग म चले के संदेश देहे हें। श्री बघेल ह कहिन कि सत्य हर मनखे के भीतर होथे। हम सबला गुरू बाबा के बताए मारग म चलके समता मूलक समाज निर्माण बर उदीम करना चाही। मुख्यमंत्री ह गुरू बाबा घासीदास के फोटू म पुष्प अर्पित करके पूजा-अर्चना करिन अऊ सबो मनखे मन के सुख-समृद्धि बर उंखर से आशीर्वाद लीन।
समारोह ल सम्बोधित करत मुख्यमंत्री ह कहिन – प्रदेश के नवनिर्वाचित सरकार ह अपन काम-काज शुरू कर देहे हे। हमन किसान मन के कर्जमाफी के जऊन वायदा करे रहेन ओ म शपथ ग्रहण के संगेच काल रात मंत्रिपरिषद के पहली बैठक म निर्णय लेके एमा जल्दी क्रियान्वयन के घलोक शुरूआत हमन कर देहे हवन। उमन कहिन कि 16 लाख ले जादा किसान मन ल करीबन छै हजार 100 करोड़ रूपिया के कर्ज के बोझ ले मुक्ति मिलही। अतकेच नहीं भलुक प्रदेश के नवनिर्वाचित सरकार ह किसान मन ल धान म 2500 प्रति क्विंटल के दर ले रूपिया देहे के वादा करे हे अऊ हम एखर खातिर वचनबद्ध हवन। दुनों फैसला म अमल बर बहुत बजट प्रावधान घलोक करे जाही। मुख्यमंत्री ह कहिन कि साल 2013 के झीरम घाटी मामला के एसआईटी जांच करवाए के घलोक हमन निर्णय लेहे हवन अऊ ए जांच म जउन भी दोषी पाइस जाही, ऊंखर खिलाफ कड़े कानूनी कार्रवाई करे जाही।
समारोह म नगर पालिका परिषद कुम्हारी के अध्यक्ष श्री स्वप्निल उपाध्याय संग बहुत अकन पार्षद अऊ बड़ संख्या म नागरिक उपस्थित रहिन।

लउछरहा..