मुख्यमंत्री पहुंचिस अनुरागी धाम : पूजा-अर्चना के संग जनता के खुशहाली बर मांगिस असीस

रायपुर, मुख्यमंत्री श्री भूपेश बघेल ह आज मुंगेली जिला के ग्राम मोतिमपुर (विकासखण्ड-पथरिया) पहुंचिस, जिहां उमन अनुरागी धाम के यज्ञ स्थल म आहुति देके हवन कुण्ड के पूजा अर्चना करिन। उमन जनता के खुशहाली बर आशीर्वाद मांगिन। श्री बघेल अनुरागी धाम समिति कोति ले आयोजित अखण्ड नवधा रामायण के समापन कार्यक्रम म घलोक सामिल होइन। ए अवसर म उमन समाधि मंदिर निर्माण बर शिलान्यास घलोक करिन।
मुख्यमंत्री ह कहिन के अनुरागी जी के दर्शन लाभ नइ मिलीस, फेर ऊंखर शिष्य श्रीवास्तव परिवार के घर जाय के अवसर मिले हे। अनुरागी जी के प्रति अटूट श्रद्धा हे अऊ मैं हमेशा याद करथंव। उमन अनुरागी बाबा के जीवन उपर आधारित सीडी के घलोक विमोचन करिन। उमन कहिन के संत मन के आशीर्वाद बिरले मनखे मन ल ही मिल पाथे। हम तो केवल चरण पादुका ल ही देखे रहेन। उमन कहिन के अनुरागी धाम म धर्मशाला या सामुदायिक भवन निर्माण बर शासन कोति ले राशि दे जाही। स्कूल शिक्षा अउ अनुसूचित जाति, जनजाति, आन पिछड़ा वर्ग विकास मंत्री डॉ. प्रेमसाय सिंह ह कहिन कि सौभाग्य के बात हे कि अइसन पवित्र स्थल म उपस्थित होए के मौका मिले हे। उमन कहिन के अनुरागी बाबा ह जनकल्याण बर काम करे रहिस। ऊंखर नाम म पवित्र धाम बने हे। राज्य सभा सांसद श्री विवेक तनखा ह घलोक मनखे मन ल सम्बोधित करिन।
ए अवसर म खाद्य, नागरिक आपूर्ति अऊ परिवहन मंत्री श्री मोहम्मद अकबर अउ बिलासपुर विधानसभा क्षेत्र के विधायक श्री शैलेष पाण्डेय संग श्री अटल श्रीवास्तव अऊ श्री राजेन्द्र शुक्ला अउ बड़ संख्या म श्रद्धालुजन, क्षेत्रीय जनप्रतिनिधि, प्रशासनिक अधिकारी अऊ आयोजन समिति के सदस्य उपस्थित रहिन।

लउछरहा..