मुख्‍यमंत्री ल सियानिन अपन हाथ ले खवाईन बोईर

रायपुर, 12 मई 2018। मुख्यमंत्री डॉ. रमन सिंह ल आज दंतेवाड़ा ले सुरू प्रदेश व्यापी विकास यात्रा के पहिली पड़ाव बड़े किलेपाल गांव के स्वागत सभा म करीबन 80 वर्षीय महिला श्रीमती कमला नाग ह तिलक लगाके आशीर्वाद दीन। उमन डॉ. सिंह ल दोना म स्वादिष्ट बोइर अऊ चिरौंजी भेंट करिन। श्रीमती कमला नाग विधवा अऊ निःसंतान हे। उंखर पांच एकड़ के खेती हे, जऊन ल ओ मन अधिया म दे देथें। एखर से उनला जऊन कुछ आमदनी होथे, ओखर से ओखर गुजारा चलथे। स्वागत सभा म श्रीमती नाग ह मनखे मन ले कहिन- मैं राम जइसे रमन बर जंगल ले बोइर अऊ चार-चिरौंजी लेके आए हवंव। श्रीमती कमला नाग ह अपन हाथ ले मुख्‍यमंत्री ल येला खवाए के इच्छा प्रकट करिन। डॉ.सिंह ह ए बात ल सुनतेच ओ मन ल सम्मानपूर्वक मंच म बलाइन। मुख्यमंत्री ह जइसनहे दोना कोति अपन हाथ बढ़ाइन त श्रीमती कमला नाग ह कहिन कि ओ मन खुदे मुख्यमंत्री ल खवाहीं। ए म डॉ. सिंह ह उंखर आग्रह सहर्ष स्वीकार कर लीन। श्रीमती नाग ह मुख्यमंत्री ल जब अपन हाथ ले बोइर अऊ चार खवाइन त डॉ. सिंह भावुक हो गें अऊ उमन सियान कमला नाग के पांव परिन। श्रीमती नाग ह ओ मन ल आशीर्वाद दीन अऊ ऊंखर उज्ज्वल अऊ यशस्वी जीवन के कामना करिन।

(adsbygoogle = window.adsbygoogle || []).push({});

ये समाचार ल आप हिन्‍दी म संवाद के वेबसाईट म ये कड़ी ले पढ़ सकत हवव।

लउछरहा..