मोदी कांग्रेस ऊपर फेर पलटीमार दुलत्ती जमाइन

दुर्ग, धर्मेन्द्र निर्मल। छत्तीसगढ़ म एक घॅव फेर बीजेपी के सरकार बनाए खातिर  जोर-शोर ले  जुटे पीएम नरेंद्र मोदी ह काल इहां के धरती ले कांग्रेस ऊपर जमके हमला बोलिस। पहिली के  मनमोहन सिंह सरकार ल रिमोट कंट्रोल वाले सरकार बतावत मोदी हॅ कांग्रेस ऊपर कटाक्ष करिन, उहें गांधी परिवार ले बाहिर के मनखे ल 5 साल तक अध्यक्ष बनाए जाए के अपन बात बर कांग्रेस ऊपर  पलटीमार के जवाब दिन।
पीएम मोदी कहिन ‘ओमन (कांग्रेसी नेता) नाम गिनावत हे  कि ये- ये अध्यक्ष बनिस। मैं कहे रहेव 5 साल तक बनाके देखौ। एक झन  पिछड़ा नेता सीताराम केसरी ल अध्यक्ष बनाए रिहिन। देश ल पता हे  के ओला कोन तरीका ले उठाके फेंक दिए गिस अऊ ओकर जगा  सोनिया गांधी ल अध्यक्ष बनाए गिस। बता देवन के कांग्रेस के वरिष्ठ नेता अऊ पूर्व वित्त मंत्री पी चिदंबरम हॅ मोदी के चैलेंज के जवाब म कांग्रेस के उन अध्यक्ष मन के नाम गिनाए रिहिसे जौन मन गांधी परिवार ले  नइ  रिहिन हे। चुनाव रैली म मोदी हॅ एकरे  जुवाब देवत कांग्रेस ऊपर फेर पलटीमार दुलत्ती जमाइन।

लउछरहा..