योगी बोलिस खतम होवत हे छत्‍तीसगढ़ म नक्सलवाद

उत्‍तर प्रदेश के मुख्यमंत्री योगी आदित्यनाथ ह आज इतवार के दिन दुर्ग म चुनावी सभा ल संबोधित करत कहिन के छत्तीसगढ म नक्सलवाद खतम होवत हे। उमन कहिन के डॉ. रमन सिंह के विकास के चलत छत्तीसगढ म माओवाद अब होवइया हे। योगी दुर्ग शहर के बीजेपी प्रत्याशी चंद्रिका चंद्राकर के बर प्रचार करे इहां गंज मंडी पहुंचे रहिन।
उमन दुर्ग ले पहिली वैशाली नगर म चुनावी सभा ल संबोधित करत कांग्रेस उपर जमके निशाना साधिन। उमन कहिन के कांग्रेस अध्यक्ष राहुल गांधी बिचारा हे। जब ओला अपन ममा गांव के सुरता आथे त लउहे इटली पहुंच जाथें। उमन कहिन के कांग्रेस कमीशनखोर मन के फौज ये। एक रुपए के काम म 75 पइसा के कमीशन कांग्रेसी खा जात रहिन। वैशालीनगर म उमन प्रत्याशी विद्यारतन भसीन के प्रचार करे बर वैकुंठधाम पहुंचे रहिन।
योगी ह कांगेस के राषट्रीय अध्यक्ष राहुल गांधी के सियानी उपर घलव सवाल उठाइन। उमन कहिन के कांग्रेस के सरकार जब दिल्ली म रहिस त छत्‍तीसगढ़ ल राज्य के विकास बर लुलवाना परत रहिस, फेर जब ले मोदी सरकार आए हे उमन ह राज्य ए भेदभाव ल खतम कर देहे हे। उमन वैशाली नगर के कांग्रेस प्रत्याशी बदरूद्दीन ले ल आभा मारत पूछिन के कुरैशी जी बैकुंठधाम के तालाब आप मन कहां बनाहू। उमन मनखे मन ल छठ पर्व के शुभकामना घलोक दीन।
वैशाली नगर के बाद दुर्ग के जुन्ना गंज मंडी म प्रत्याशी चंद्रिका चंद्राकर के पक्ष म चुनावी सभ ल संबोधित करिन। एखर बाद मिलाई नगर विधानसभा क्षेत्र के मंगल भवन मैदान खुसीपार के सभा म घलव गीन। जिहां प्रेम प्रकाश पांडेय के पक्ष म चुनावी भासन देके मतदाता मन ल भाजपा प्रत्याशी ल जीताए बर कहिन । एखर बाद रिसाली के दशहरा मैदान म दर्ग ग्रामीण के प्रत्याशी जागेश्वर साहू के पक्ष म सभा ल संबोधित करिन। भाजपा के राष्ट्रीय महासचिव सरोज पांडेय अउ जिला अध्यक्ष उषा टावरी ये समय म मंच म उपस्थित रहिन।

लउछरहा..