रद्दा रेगइया मन बर पानी के नान्हे फोहारा

ठंडा पानी के संगे संग लू ले बचाए के उदीम

धमेन्‍द्र निर्मल के सार समाचार, आज काल गरमी मरे जीयो ले भक्कम बाढ़ गे हवय। अहसन म रद्दा रेंगइया मन ल गरमी अउ लू ले बचाए खातिर नगर निगम भेलई डाहर ले बने बढिया बूता करे जावत हे। निगम के जोन क्रमांक चार म अवइया डबरापारा म नगर निगम डाहर ले छइहां बर तालपतरी लगाके पानी के फोहारा (मिस्टिंग शॉवर) के बेवस्था करे जावत हे। ये नानचुक फोहारा ले सरलग पानी के फोहारा निकलही जउन ह रद्दा रेंगइया मन के जी ल जुड़वाही।
नगर निगम डाहर ले जोन क्रमांक 4 कार्यालय के तीर डबरा पारा चैक मेरन यहा तरा भक्कम गर्मी म यात्रा करत अवइया जवइया बटोही मन बर तालपतरी लगा के
गरमी अउ लू ले बचाए बर नानचुक फोहारा लगाए गे हवय। ये फोहारा ले निकलत पानी के नान्हे नान्हे दाना मन के फोहार ह मनखे के देंह ले जुड़वाए के काम करही। इहां थोरिक बेर थिराए बर खुर्सी के बेवस्था घलो करे गे हवय। संगे संग मरकी म पानी तको भर के राखे गे हे जेकर ले उन रद्दा देंगइया मन
के पियास बूझावय।



आयुक्त एसके सुंदरानी हँ जोन क्रमांक 4 क्षेत्र अंतर्गत गजब अकन काम बूता के जाँच परख करे रिहिने जेमा उन मन गरमी अउ लू बचाए के उपाय अपनाए के तको
निर्देष जोन क्रमांक 4 के आयुक्त ल देहे रिहिसे। ओइसनेहे जम्मो जोन क्षेत्र मन म घलो गर्मी ले बचाव खातिर किसम किसम के उदीम करे के निर्देश देहे गे हावय। एकर ले पहिली जोन क्रमांक 1 क्षेत्र के अंतर्गत नेहरू नगर चैक म बने यात्री प्रतिक्षालय म नान्हे फोहारा (सूक्ष्म फव्वारा) लगाए के काम पूरा कर डारे हवयं। ये मेरन बस, वाहन आदि के बाट जोहत बहुत झन लोगन मन अगोरत रहिथे। ये जगा म बइठे बर खुर्सी के संगे संग पंखा अउ जुड़ पानी के बेवस्था करे गे हवय। अइसनेहे बेवस्था मदर टैरेसा नगर के जोन क्रमांक 3 कार्यालय के आगू म घलो करे गे हवय जउन ह राजमार्ग (हाइवे) ले लगे हवयं।


चटकारा
नकछेद्दा:- ए फोहारा उहारा के चक्कर ल छोड़ भाई, चल घर के नल म पानी आए हे के नइ आए हे तेला देखबो।
कनछेद्दा:- सही कहे भाई, नइते डब्बा डब्बा डोहारे बर लगही चल…चल….चल

लउछरहा..