राज्य स्तरीय खो-खो खेलइया होनहार लइका मन के जिनगी के सपना रहिगे अधूरा

धर्मेंद्र निर्मल के सार समाचार, जिनगी म कुछू न कुछू करे के बड़का सपना आँखी म सँजोए दुरूग जिला के अरसनारा गाँव के दू झिन राज्य स्तरीय खो-खो खेलइया होनहार लइका मन अपन आँखी ल मूंद लिन। पुलिस नइ तो कोनो न कोनो सरकारी नौकरी के आस म बड़े बिहिनिया ले उठ के अभ्यास खातिर दउँड़त -दउँड़त उदुपहा आज उन्कर जिनगी के गति एक ठिन सड़क दुर्घटना म थम गे। ए दुर्धटना म उन्कर परिवार के आँसू तो नइ थम पावत रिहिन बल्कि उन्कर संग आज जम्मो गाँव रो डारिन।




जइसन जानबा होए हे तेकर अनुसार मेनका पटेल, चुम्मन साहू अउ देवकी उर्फ निशा यादव बिहानी दउँड़ खातिर बिहिनिया 4.30 बजे निकले रिहिसे कि अरसनारा अउ पंदर चउँक के बीच के एक ठो तेज रफ्तार हाइवा हँ मेनका पटेल अउ चुंम्मन साहू ल टोकर मार दिस जेकर ले उन दूनो के तुरते मौत होगे।




मौत के कहानी निशा के जबानी
मेनका पटेल अउ चुम्मन साहू के मौत के घटना ल अपन आँखी म देखे निशा यादव सदमा म हावै। वो ले दे के अतके बता पाइस कि हमन हरेक दिन बरोबर आजो तीनों झिन अभ्यास खातिर दउँड़े बर निकले रहेन ओइसनेहे म एक ठिन हाइवा तेज रफ्तार म आइस अउ मेनका अउ चुम्मन ल अपन चपेट म ले लिस। मैं सहायता खातिर चीखत चिल्लावत रहिगेंव अउ ओतके म उन दूनों के परान छूटगे।




तोर इच्छा तैं जान ईस्वर
जग होगे अंधियार हमर बर
देखाके सपना झन लूटे कर
या तो सपना झन देखाए कर
ओउम शान्ति शान्ति शान्ति



लउछरहा..