वोट डारे बर दुुलहा-दुलहिन के गजब के उछाह : देखव रंग रंग के उदीम

नई दुनिया के खबर के मुताबिक जशपुर जिला म कई जगा बहुत उछाह देखे ल मिलिस। तपकरा थाना क्षेत्र के ग्राम आमडीहा निवासी युवक प्रदीप राम के शादी बर आज मंगलवार भिनसरहा बरात निकलइया रहिस। दूलहा पागा लगाके तइयार होइस अउ पहिली मतदान करे बर बूथ गईस। उहां लाइन म लग के पहिली वोट दीस। ओखर बाद वो बरात ल लेके रवाना होइस। प्रदीप राम के बिहाव आजेच विकासखंड दुलदुला म होवत हे। प्रदीप ह कहिस के वो अपन नैतिक कर्तव्य ल समझथे ए खातिर ओ हर तय करिस के वो मतदान करे के बादेच बिहाव करे बर निकलही।



प्रदीप के बताती कई झन मनखे मन ओला रोकत रहिन के एक मनखे के वोट नइ देहे ले का होही। फेर ओ ह ककरो बात नइ मानिस अऊ सब ल मतदान करे के अपील करत पहिली खुदे मतदान करिस अऊ सबो बाराती मन ल मतदान करे बर भेजिस। मतदान बर बारात करीबन ढाई घंटा रुके रहिस अउ जब सब मन मतदान कर डरिस त बारात रवाना होइस।




बारात निकले ले पहिली दूलहा मन ह डारिन वोट
एती भिलाई ले तको खभर हे के दुर्ग लोकसभा के पाटन विधानसभा अंतर्गत ग्राम पचपेड़ी म बारात निकले ले पहिली दूलहा मन ह मतदान करिन। इहां के तुम लाल यादव अउ आर यादव दुनों के बारात निकलिस। दुनों ह पहिली मतदान केंद्र म पहुंचके मतदान करिस। ओखर बाद बारात रवाना होइस।



बिलासपुर के मुंगेली म दुलहा बारात जाय ले पहिली मतदान करे ल पहुंचिस, ग्राम जिया म राष्ट्र के महापर्व मतदान म जागरुक मतदाता के परिचय देवत दुलहा के रूप म लक्ष्मी नारायण साहू अऊ हरदी लगे राजेश वर्मा घलोक वोट देहे पहुंचिन।




रायगढ़ म तको दुलहा बने ले पहिली विनय साहू ह मतदान केंद्र नंबर 249 ग्राम रुचिदा म बारात निकले ले पहिली अपन कर्तव्य के पालन करत वोट दीस।



दुलहा -दुलहिन शादी के जोड़ा म मतदान करे ल पहुंचिन
भिलाई के ग्राम सोनपुर के मतदान केंद्र म घलव एक दुलहा अपन दुलहिन ल लेके घर जाय के बलदा मा सीधा मतदान केंद्र पहुंचिस अऊ मतदान करिस। सोनपुर के युवक देवव्रत यादव के बारात मंगलवार के भिनसरहा गांव पहुंचे रहिस। मतदान करे के बाद ओ हर घर पहुंचके डोला परछन के रस्म अदा करिस।




बिलासपुर के मुंगेली जिला के सल्फा म बिहाव होए के बाद दुलहा -दुलहिन शादी के जोड़ा म मतदान करे ल पहुंचिन।



पहिली मतदान फेर शादी के नेंग
भिलाई के ग्राम सोरम निवासी मीनू वर्मा ह बिहाव के नेंग शुरू होए ले पहिली मतदान करिस। सोरम निवासी धनेश वर्मा के बेटी मीनू वर्मा के बिहाव होवत हे। बिहाव के सबो नेंग-जोग पूरा कराये के पहिली मीनू ह अपन मताधिकार के परयोग करे के इच्छा जताईस। परिजन मन ह हामी भरिन अऊ मीनू ह परिजन के संग ग्राम सोरम के बूथ नंबर 148 म पहुंच के मतदान करिस। मीनू ह कहिस के सरकार के गठन म भागीदारी कर ओला खुद उपर गर्व महसूस होवत हे।


फोटू अउ समाचार नई दुनिया ले साभार



लउछरहा..