संगोष्ठी के संग शुरू होइस विश्व धरोहर हफ्ता

रायपुर। राज्य सरकार के संस्कृति अऊ पुरातत्व संचालनालय कोति ले आज इहां विश्व धरोहर हफ्ता के शुभारंभ के अवसर म संगोष्ठी के आयोजन करे गीस। महंत घासीदास संग्रहालय के सभागार म आयोजित संगोष्ठी म ’धरोहर मन के संरक्षण बर लोक चेतना’ विसय म विद्वान मन ह अपन विचार व्यक्त करिन। संस्कृति अऊ पुरातत्व विभाग के संचालक श्री तारन प्रकाश सिन्हा ह आमंत्रित वक्ता मन के स्वागत करिन। संगोष्ठी म छत्तीसगढ़ के वरिष्ठ इतिहासकार अऊ पुरातत्ववेत्ता पद्मश्री सम्मानित श्री अरूण कुमार शर्मा, पुरातत्वविद श्री जी.एल.रायकवार, वरिष्ठ मानव विज्ञानी अऊ आंचलिक संस्कृति विशेषज्ञ श्री अशोक तिवारी अउ आन बहुत अकन विसय खांटी जानकार ह छत्तीसगढ़ के संदर्भ म पुरातात्विक धरोहर मन के संरक्षण उपर अपन बात रखिन।
श्री अरूण कुमार शर्मा ह धरोहर मन के संरक्षण बर जन-जागरण उपर जोर दीन अऊ कहिन के एखर बर अइसन प्राचीन स्मारक मन म उंखर से संबंधित फोटो प्रदर्शनी के आयोजन करे जाना चाही। उमन ए संबंध म पढ़ईया लईका मन बर स्कूल-कॉलेज मन म प्रतियोगिता मन के आयोजन करे के घलोक जरूरत बताइन। श्री शर्मा ह महापाषाण युग के स्मारक मन के संरक्षण उपर विशेष ध्यान देहे के जरूरत प्रकट करिन। ए अवसर म छत्तीसगढ़ कॉलेज रायपुर के इतिहास विभाग के प्राध्यापक डॉ. अनूप परसाई, मुख्य रसायनज्ञ डॉ. के.पी. वर्मा, डॉ. वृषोत्तम साहू, डॉ. अरूंधति परिहार, श्रीमती सीमारानी तिवारी, श्री प्रवीण तिर्की अऊ संग्रहाध्यक्ष डॉ. पी.सी. पारख घलोक उपस्थित रहिन। कार्यक्रम के संचालन श्री प्रभात कुमार सिंह ह करिस।