सरगुजा, सूरजपुर अऊ कोरिया म निर्वाचन के तैयारी मन के लीन जायजा

मुख्य निर्वाचन पदाधिकारी ह अधिकारी मन ल दीन जरूरी निर्देश
मतदाता जागरूकता बर अभिनव प्रयास मन ल सराहिन

छत्तीसगढ़ के मुख्य निर्वाचन पदाधिकारी श्री सुब्रत साहू ह आज सरगुजा, सूरजपुर अऊ कोरिया जिला मन के दौरा कर विधानसभा निर्वाचन के तैयारी मन के समीक्षा करिन। ए जिला मन म उमन मतदान केन्द्र मन अऊ मतगणना स्थल मन के जायजा लीन अऊ जिला निर्वाचन अधिकारी मन अउ निर्वाचन काम म लगे अधिकारी मन के बैठक लीन। जिला मुख्यालय म आयोजित बैठक मन म उमन मतदान के तैयारी मन के समीक्षा करिन अऊ अधिकारी मन ल जरूरी निर्देश दीन। ए दौरान विधानसभा निर्वाचन के सुरक्षा नोडल अधिकारी अउ पुलिस महानिरीक्षक श्री दीपांशु काबरा, अकतहा मुख्य निर्वाचन पदाधिकारी डा. एस. भारतीदासन, जिला निर्वाचन अधिकारी, विधानसभा क्षेत्र मन के रिटर्निंग अधिकारी, संयुक्त मुख्य निर्वाचन पदाधिकारी श्रीमती पद्मिनी भोई साहू समेत आन प्रमुख अधिकारी मौजूद रहिन।
मुख्य निर्वाचन पदाधिकारी श्री साहू ह तीनों जिला मन म मतदान केन्द्र मन के निरीक्षण करके उहां बिजली, पानी, शौचालय, फर्नीचर अउ दिव्यांग मन बर रैम्प के व्यवस्था सुनिश्चित करे के निर्देश दीन। उमन इलेक्ट्रानिक वोटिंग मशीन मन के कमीशनिंग, रेण्डमाईजेशन, अधिकारी-कर्मचारी मन ल समय म डाक मतपत्र वितरित करे, वेबकास्टिंगग वाले मतदान केन्द्र मन अऊ महिला मतदाता मन बर बनाये जात संगवारी मतदान केन्द्र मन के बारे म घलोक जानकारी लीन।
मुख्य निर्वाचन पदाधिकारी श्री साहू ह स्ट्रांग रूम अऊ मतगणना स्थल मन के सुरक्षा के पुख्ता इंतजाम करे ल कहिन। मतगणना के समय मीडिया गैलरी बर निरधारित स्थान के निरीक्षण करत जरूरी निर्देश दीन। श्री साहू ह मतदान दिवस अउ मतदान के एक दिन पहिली उम्मीदवार मन कोति ले प्रिंट मीडिया म प्रकाशित कराये जाय वाले विज्ञापन मन के एमसीएमसी ले प्रमाणन अनिवार्यतः कराए के निर्देश दीन। उमन मतदान के दिन माकपोल अऊ मतदान प्रतिशत के जानकारी हर दू घण्टा म देहे बर जरूरी व्यवस्था करे ल कहिन। श्री साहू ह एखर लिए सी-टाप्स एप्लीकेशन ल सबो सेक्टर अधिकारी मन के मोबाइल म डाउनलोड कराए अउ एखर उपयोग के संबंध म प्रशिक्षित करे के निर्देश दीन।
मतदाता जागरूकता के तहत सरगुजा म स्कूली लइका मन से सोल्जर्स आफ डेमोक्रेसी के गठन करे के स्कूली लइका मन के उदीम मन के सराहना करिन। श्री साहू ल लइका मन ह बताइन कि ओ मन अपन परिवार के सबो सदस्य मन ल मतदान करे बर प्रेरित करहीं। एखरे संग ओ मन 50 आन मनखे मन ल घलोक मतदान करे बर प्रेरित करे के प्रयास करहीं। एखर ले अकतहा सरगुजा जिला म चेम्बर आफ कामर्स ह घलोक पहल करे हे। एखर तहत सबो दुकानदार मतदाता मन ल मतदान दिवस म विशेष छूट देहीं। एखर बर मतदाता मन ल मतदान के अमिट स्याही देखाना होही। अम्बिकापुर शहर म सबो वार्ड मन म जाके कला जत्था कोति ले मतदाता जागरूकता ले संबंधित कार्यक्रम आयोजित करे जात हे।

लउछरहा..