स्‍वामी विवेकानंद के संदेश मन के सार्थकता पूरा दुनिया बर : श्री भूपेश बघेल

मुख्यमंत्री ह स्‍वामी विवेकानंद तकनीकी विश्वविद्यालय परिसर म करिस करीबन 68 करोड़ रूपिया के निर्माण काम मन के भूमिपूजन

रायपुर, मुख्यमंत्री श्री भूपेश बघेल कहिन हे के स्‍वामी विवेकानंद के संदेश मन के सार्थकता पूरा दुनिया बर हे। स्‍वामी विवेकानंद ह देश अऊ दुनिया ल मानवता के कल्याण के मार्ग देखाइस। उमन नर-नारायण के सेवा ल सबले बड़े उद्देश्य बताइए हें। मुख्यमंत्री आज दुर्ग जिला के नेवई स्थित स्‍वामी विवेकानंद तकनीकी विश्वविद्यालय परिसर म स्‍वामी विवेकानंद जंयती समारोह ल सम्बोधित करत रहिन। उमन विश्वविद्यालय परसिर म करीबन 68 करोड़ के लागत के कई ठन निर्माण काम मन के भूमिपूजन करिन। ए अवसर म गृह अउ लोक निर्माण मंत्री श्री ताम्रध्वज साहू, वाणिज्य कर अउ उद्योग मंत्री श्री कवासी लखमा, तकनीकी शिक्षा मंत्री श्री उमेश पटेल, विधायक अऊ नगर निगम भिलाई के महापौर श्री देवेन्द्र यादव अऊ कोण्डागांव विधायक श्री मोहन मरकाम विशेष अतिथि के रूप म उपस्थित रहिन।

मुख्यमंत्री श्री बघेल ह विश्वविद्यालय परिसर म स्थापित स्‍वामी विवेकानंद के प्रतिमा उपर माल्यार्पण करके ओ मन ल विनम्र श्रद्धांजलि अर्पित करिन। श्री बघेल ह इहां विवेकानंद युवा कौशल सेतु योजना के शुभारंभ घलोक करिन। मुख्यमंत्री ह स्‍वामी विवेकानंद जयंती के अवसर म इहां आयोजित समारोह ल सम्बोधित करत स्‍वामी विवेकानंद के छत्तीसगढ़ म बिताए गए पल मन ल स्मरण करत कहिन के स्‍वामी विवेकानंद 12 साल के उमर म जबलपुर ले बइलागाड़ी ले रायपुर आए रहिन। ओ मन युवा मन के प्रेरणा स्त्रोत रहिन। उंखर स्मृति ल चिस्थायी बनाए रखे बर ऊंखर जन्म दिवस ल युवा दिवस के रूप म मनाए जाथे।

मुख्यमंत्री श्री बघेल ह कहिन के स्‍वामी जी के संदेश मन ले प्रेरित होके स्‍वामी आत्मानंद महाराज ह रायपुर म विवेकानंद आश्रम के स्थापना करिन। विवेकानंद आश्रम म स्‍वामी जी के स्मृति मन ल अक्षुण्य रखे के काम करे जात हे। उमन प्रदेशवासी मन ल स्‍वामी विवेकानंद के जयंती के शुभकामना देवत ऊंखर काम अऊ संदेश ल आत्मसात करत आगू बढ़े अऊ प्रदेश के विकास म सहभागी बने के जरूरत बताइन।

लउछरहा..