डॉ. प्रेमसाय सिंह टेकाम ह नवीन व्यावसायिक शिक्षा रोजगार मेला म 302 पढ़ईया लईका मन ल जॉब ऑफर पत्र सौंपिन
रायपुर, स्कूल शिक्षा मंत्री डॉ. प्रेमसाय सिंह टेकाम आज नवीन व्यावसायिक शिक्षा म पंजीकृत अऊ कक्षा 12वीं पढ़ईया लईका मन बर रायपुर के व्ही.आई.पी. रोड स्थित शगुन फॉर्म हाऊस म आयोजित दू दिवसीय रोजगार मेला म सामिल होइन। उमन मेला म पहिलिच दिन रोजगार बर चुने गए 302 पढ़ईया लईका मन ल जॉब ऑफर पत्र प्रदान करिन।
रोजगार मेला म सूचना प्रौद्योगिकी क्षेत्र के कंपनी सेंटम कोति ले 37, आईएल एण्ड एफएस कोति ले 50, एमपावर कोति ले 10, आइसेक्ट कोति ले 26 पढ़ईया लईका मन के चयन करे गीस। हेल्थ केयर क्षेत्र के कंपनी विद्यांता कोति ले 30, स्कील ट्री कोति ले 35 पढ़ईया लईका मन के चयन करे गीस। ऑटोमोबाइल क्षेत्र के कंपनी म ग्राम तरंग कोति ले 68, रिटेल क्षेत्र के कंपनी एमपावर कोति ले 15 अऊ एग्रीकल्चर क्षेत्र के कंपनी बी-एबल कोति ले 31 पढ़ईया लईका मन के रोजगार बर चयन करे गीस।
स्कूल शिक्षा मंत्री डॉ. टेकाम ह रोजगार मेला म चुने गे पढ़ईया लईका मन ल बधाई देवत ऊंखर उज्ज्वल भविष्य के कामना करिन। उमन कहिन कि जिंकर चयन नइ होय हे वो उदास झन होवयं, भलुक अपन हुनर ल अऊ निखारके थिलिंग तक पहुंचय। जीवन म सफलता, असफलता मिलत रहिथे, सबले बड़े बात हे प्रतियोगिता म हिस्सा लेवइ। इहां आयोजित रोजगार मेला म सामिल होवइया पढ़ईया लईका मन ल अनुभव के लाभ मिलही। डॉ. टेकाम ह कहिन कि व्यावसायिक शिक्षा पढ़ाई के संग रोजगार घलोक देथे।
