चक्रधर समारोह के चौथइया दिन मनखे मन ह उठाइन प्रस्तुति मन के आनंद
रायगढ़, चक्रधर समारोह म आज रामलीला मैदान म राज्य के प्रख्यात पंडवानी गायिका श्रीमती ऋतु वर्मा ह पंडवानी गायन ले सबो ल मंत्रमुग्ध कर दीस। उन्हें लखनऊ घराना के कथक कलाकार श्रीमती नेहा बनर्जी के प्रस्तुति ह सबो के मनमोह लीस। प्रख्यात बांसुरी वादक श्री रजत प्रसन्ना के बांसुरी वादन के सुमधुर तान ह घलोक मनखे मन के खूब ताली बजवाइस। श्री रजत प्रसन्ना ह रामदुर्गा म बंदिश छंद-ताल, धु्रव तीन ताल म छंद अऊ वैष्णव जनते प्रस्तुत दीन। श्री नासिर खान अउ निंदर ह सूफी संगीत प्रस्तुत करिन। पंडित राम सरगुजा के टीम ह शैला अउ बायर नृत्य के मनमोहक प्रस्तुति दीन।
चक्रधर समारोह के चउथईया दिन पंडवानी गायिका श्रीमती ऋतु वर्मा ह पंडवानी के माध्यम ले महाभारत के प्रसंग मनखे मन ल सुनाइन। उमन अपन कलाकार मन के संग वेदमति शैली म श्री कृष्ण अऊ अर्जुन के प्रसंग व्यक्त करिन। मुम्बई ले आए प्रख्यात कथक कलाकार श्रीमती नेहा बनर्जी ह एकताल, तीनताल अऊ 21 चक्कर म प्रस्तुति दीन। उमन झन-झन झंकार बजत हे के बोल म अऊ राधा-कृष्ण के रूठने-मनाने के प्रसंग म सखी रे काहे कान्हा मोसे बोलत नाही म कथक कर प्रस्तुति दीन। उमन राग मेघ मल्हार म तराना के प्रस्तुति घलोक दीन।
कार्यक्रम के शुभारंभ विधायक श्री प्रकाश नायक ह करिस। ये बेरा म सभापति श्री सलीम नियारिया, जिला पंचायत सीईओ सुश्री ऋचा प्रकाश चौधरी, राज परिवार ले सुश्री उर्वशी देवी, अपर कलेक्टर श्री सुखनाथ अहिरवार अउ आर.ए.कुरूवंशी संग गणमान्य नागरिक अउ जनसामान्य उपस्थित रहिन।
