प्रदीप टंडन संघ के कार्यकारिणी के नवा उपाध्यक्ष
रायपुर, छत्तीसगढ़। घुड़सवारी संघ छत्तीसगढ़ के आमसभा के बइठक के जानकारी सेट प्रपत्र ले कार्यालय रजिस्ट्रार फर्म्स अउ संस्थाएं छत्तीसगढ़ कोति ले 12 सितंबर 2019 के दिन देहे गए रहिस। ए बइठक के सूचना के मुताबिक बइठक म नवा पदाधिकारी मन ल सामिल करे गए हे। ये बइठक म सकलाए जमों सदस्य मनखे मन ल ये जानकारी देहे गइस। जेमा श्री प्रदीप टंडन ल वाइस प्रेसिडेंट सर्वसम्मति ले नियुक्त करे गीस। ए बैठक म चुने गए पदाधिकारी मन म श्रीमती गीता सिंह अध्यक्ष, श्री प्रदीप टंडन उपाध्यक्ष, ब्रिगेडियर बी के पनवार जनरल सेक्रेटरी, महाराजा कमल चंद्र भंजदेव ट्रेजरर, श्री अखिलेश दुबे संयुक्त सचिव, श्री रूप कुंतल सदस्य, श्री मेघ निवास सदस्य, श्री हरविंदर मलिक सदस्य, श्रीमती अस्मिता कटारिया सदस्य, श्री राकेश गुप्ता सदस्य के रूप म होहीं। ये संघ ह घुड़सवारी ल देश-प्रदेश म प्रोत्साहन देहे के उद्देश्य बर अपन काम करही।
प्रदीप टंडन जी ले बात करे म पता चलिस कि संघ ह अपन कार्यक्रम मन म स्कूल अऊ आन संस्था मन ल सामिल करके ओ मन ल प्रशिक्षण देके, प्रतिस्पर्धा बर तियार करे बर प्रेरित करहीं। ऊंखर बताए मुताबिक घुड़सवारी शारीरिक अउ मानसिक संतुलन के ताल मेल ल मज़बूत करथे अऊ स्कूल के विद्यार्थी मन बर महत्वपूर्ण प्रक्रिया साबित हो सकत हे।
एखर से ये अंदाजा लगाए जा सकत हे कि अब छत्तीसगढ़ ल एक बहुत अच्छा नवा खेल के रूप म घुड़सवारी के घलोक मौका मिलही जेखर से इहां के प्रतिस्पर्धी लइका अऊ आन सबो मनखे ये मां अपन प्रतिभागी योग्यता देखा पाहीं।
