मुख्यमंत्री ह अरसी के रेसा ले कपड़ा तियार करे के नवाचार म अग्रणी बुनकर मन ल ल दीन 25 लाख रूपिया के अनुदान
रायपुर, मुख्यमंत्री श्री भूपेश बघेल ह आज इहां अपन निवास म जन चौपाल, भेंट-मुलाकात कार्यक्रम म जांजगीर-चांपा जिला के बुनकर सहकारी समिति सिवनी के बुनकर मन ल अरसी के रेसा ले कपड़ा तियार करे बर जरूरी मशीन मन बर अपन स्वेच्छानुदान ले 25 लाख रुपिया के आर्थिक सहायता मंजूर करे हें।
ये बुनकर सहकारी समिति के पांच बुनकर रामाधार, अशोक कुमार देवांगन, हेमंत देवांगन, महेन्द्र देवांगन अऊ कलेश राम अरसी के रेसा ले कपड़ा बनावत हे। ए मन ह मुख्यमंत्री ले मुलाकात करके ओ मन ल बताइन कि उंखर समिति कोति ले अरसी के बेकार रेसा ले कपड़ा अऊ आन उत्पाद तियार करे जात हे फेर ये काम हाथ ले करे जात हे, जेखर सेती कपड़ा के गुणवत्ता मशीन ले तियार कपड़ा ले कुछ कम हे अऊ उत्पादन घलोक कम मात्रा म हो पात हे। कहूँ एखर बर जरूरी मशीन मिल जाही त कपड़ा के उत्पादकता घलोक बढ़ही अऊ गुणवत्ता घलोक उत्कृष्ट श्रेणी के हो जाही। पांचों बुनकर मन ह 5-5 लाख रूपिया के अनुदान देहे के आग्रह मुख्यमंत्री ले करिन। उमन मुख्यमंत्री ल बताइन कि ओ मन ल 20 स्पिनिंग मशीन के जरूरत हे जेकर लागत करीबन तीन लाख हे अऊ एक कार्डिंग मशीन जेकर कीमत 22 लाख रूपिया हे, के जरूरत हे।
मुख्यमंत्री ह बुनकर मन के बात ल गंभीरता ले सुनिन अऊ मशीन बर 25 लाख रुपए के स्वीकृति प्रदान कर दीन।
