कई ठन संघ के प्रतिनिधि मन अऊ आमजन ह शासन के योजना मन बर करिन आभार
रायपुर, मुख्यमंत्री श्री भूपेश बघेल ले आज इहां ऊंखर निवास म आयोजित ‘जनचौपाल भेंट-मुलाकात’ कार्यक्रम म प्रदेश भर ले बड़ संख्या म आए नागरिक मन अऊ प्रतिनिधिमण्डल मन ह भेंट करिन। मुख्यमंत्री के घर के दुवारी ह अवइया मन बर खुले रहिस। मुख्यमंत्री ह नागरिक मन के समस्या मन ल सुनिन अऊ ऊंखर सुझाव, जनहितकारी योजना मन के संबंध म ऊंखर विचार मन ले घलोक अवगत होइन। मुख्यमंत्री ह आत्मीयता के संग नागरिक मन ले बातचीत करिन अऊ उंखर समस्या मन के निराकरण बर निर्देश जारी करिन।
मुख्यमंत्री श्री भूपेश बघेल के संवेदनशीलता ले आज जन चौपाल, भेंट-मुलाकात कार्यक्रम म जरूरतमंद मन ल अपन खुद के छोटे-मोटे व्यवसाय चालू करे बर घलोक सहायता मिलीस। कबीरधाम जिला के बोडला विकासखंड के ग्राम कांपा ले आए राजा राम साहू ह मुख्यमंत्री ल बताइस कि ओ ह अपन गांव म एक मोटरसाइकिल के गैरेज चालू करना चाहत हे। वो ह मोटरसाइकिल मरम्मत के काम सीखे हे अऊ ये काम के संग वोकर परिवार के पालन पोषण संभव हो सकही। मुख्यमंत्री ह वोकर बात ल सहानुभूतिपूर्वक सुनिन अऊ मोटरसाइकिल गैरेज चालू करे बर दस हजार रूपिया के सहायता राशि स्वेच्छानुदान ले मंजूर कर दीन।
बिलासपुर जिला के मस्तूरी के श्रीमती रेखा बाई गेंदले ह घलोक मुख्यमंत्री ले मुलाकात करके ओ मन ल बताइस कि ओ ह अपन घर म ही होटल के व्यवसाय चालू करना चाहत हे, एखर बर ओला आर्थिक सहायता के जरूरत हे। मुख्यमंत्री ह ओ ला दस हजार रूपिया के राशि स्वेच्छानुदान ले स्वीकृत करिन। मुख्यमंत्री निवास म आयोजित जन चौपाल भेंट-मुलाकात म कृषि साख सहकारी समिति के प्रतिनिधि मन ह मुख्यमंत्री श्री भूपेश बघेल ले मुलाकात करके कृषि क्षेत्र म किसान ऋण माफी, 2500 रू. प्रति किण्टल धान खरीदी मूल्य संग आन निर्णय बर सरकार के आभार व्यक्त करके सहकारी समिति मन के माँग अउ समस्या के सम्बंध म ज्ञापन दीन।
जनचौपाल भेंट-मुलाकात म कसडोल निवासी श्री पतीराम जायसवाल ह मुख्यमंत्री श्री भूपेश बघेल ले मिलके ग्राम सुराजी योजना के नरवा, गरवा, घुरवा अऊ बाड़ी बर आभार व्यक्त करिस। श्री पतीराम कृषि के क्षेत्र म 25 राष्ट्रीय स्तर के पुरस्कार प्राप्त करे हे।
