रायपुर, मुख्यमंत्री श्री भूपेश बघेल के आज केराझरिया म आयोजित चौपाल म अजब बात होइस, प्रदेश के माटीपुत्र मुख्यमंत्री श्री भूपेश बघेल ह आज बड़ सहजता ले एक ग्रामीण महिला श्रीमती कौशिल्या डिक्सेना बर खुदे माईक पकडि़न अऊ श्रीमती डिक्सेना ह उपस्थित गांव वाले मन ल जैविक खाद के उपयोग के बारे म रोचक जानकारी दीन।
होइस ये के मुख्यमंत्री श्री भूपेश बघेल चौपाल म उपस्थित ग्रामीणजन मन ल खेत मन म जैविक खाद के उपयोग ले उत्पादन बढ़ाए के तरीका बतावत रहिन, तभे अचानक तीर म खड़े महिला श्रीमती कौशिल्या डिक्सेना ह घलोक जैविक खाद बनाए के तरीका अऊ ओखर से होवइया फायदा मुख्यमंत्री ल बताना शुरू कर दीस। एकबानगी तो चोपाल म उपस्थित सबो मंत्री अऊ अधिकारी श्रीमती कौशिल्या ल देखत रहि गय, फेर मुख्यमंत्री ह श्रीमती कौशिल्या कोति अपन खुद के माईक ल कर दीन अऊ जब तक कौशिल्या बोलत रहिस, श्री बघेल अपन हाथ म माईक धरे रहिन।
श्रीमती कौशिल्या ह बड़ सहज अऊ बेबाकी ढंग ले गांव वाले मन ल मवेशि मन के गोबर, गौमूत्र अऊ पेंड़ के सूखा पत्ता जइसे कचरा ले कम्पोस्ट खाद बनाए के तरीका बताइस। मुख्यमंत्री ह इही दौरान केराझरिया के एक आन महिला श्रीमती संतोषी महंत कोति ले नरवा, गरूवा, घुरवा, बाड़ी योजना उपर रचित गीत घलोक सुनिन अऊ ओ गीत के ऑडियो सीडी के घलोक विमोचन करिन।
