रायपुर, जिंदल स्टील के रायपुर मशीनरी डिवीजन में विश्वकर्मा पूजा आयोजित करे गीस। वैश्विक दैवीय आर्किटेक्ट के रूप म चिर परिचित विश्वकर्मा भगवान के जिंदल स्टील रायपुर मशीनरी डिवीजन म पूजा आयोजित करे गीस। हरेक कमईया भाई, जऊन औज़ार मन ले काम करथे ओ मन विश्वकर्मा पूजा करथें अउ विश्वकर्मा जी ल मूर्त स्वरूप भगवान मानथें। विश्वकर्मा जी ल ये संसार के महल, मंदिर अउ घर दुआर, सड़क अउ कारखाना मन के सिरजइया भगवान माने जाथे। तेकरे सेती सबो कर्म प्रधान मनखे मन जऊन औजार ले काम करथे वो मन, विश्वकर्मा जी ल पूजथें। ये घलोक माने जाथे कि उमन संसार के रचना ल अकार दिए रहिन। मान्यता ये घलोक हे कि, भगवान कृष्ण के द्वारका के रचना विश्वकर्मा भगवान ह करे रहिस। इहि कड़ी म ये घलोक मान्यता हे, कि पांडव मन के मायासभा अउ ऊंखर उन्नत किसिम के औजार अउ जम्मो हथियार मन के जनक घलोक विश्वकर्मा जी ही रहिन।
हर साल जइसे ये साल घलोक जिंदल स्टील रायपुर के मशीनरी डिवीजन म विश्वकर्मा भगवान के जयंती के आयोजन अपन उन्नत रूप म रायपुर कारखाना परिसर म आयोजित करे गीस। पूजा म एचआर हेड सूर्योदय दुबे, अरुण गुप्ता, वर्कशॉप हेड सुनील गुप्ता, फेब्रिकेशन हेड मुकेश तिवारी विशेष तौर म उपस्थित रहिन संग म सबो कर्मचारी श्रमिक भाई अपन परिवार के संग उपस्थित रहिन। परिवार के मनखे मन कारखाना के औजार अउ मशीन मन ल तको देखिन।
पूजन के कार्यक्रम बिहनिया 10:00 बजे ले सुरु होइस, जेमां मूर्ति स्थापना, पूजा अर्चना, पारिवारिक मनखे मन के कार्यक्षेत्र दर्शन अउ मूर्ति वंदना के बाद प्रसाद वितरण करे गीस। एखर बाद सबो मनखे मूर्ति दर्शन वर्कशॉप शेड म करिस। संझा बेरा मूर्ति विसर्जन के कार्यक्रम होइस।
