बाड़ी योजना ले राजकुमार के बाढि़स आमदनी

रायपुर, बाड़ी योजना के तहत बाड़ी के संरक्षण अऊ संवर्धन ले छोटे किसान मन ल भरपूर लाभ मिले लगे हे। ओ मन मौसमी साग-भाजी उबजा के मुनाफा कमावत हें। बेमेतरा जिला के विकासखण्ड साजा के ग्राम पेण्ड्रावन के किसान राजकुमार पटेल ह बताइस कि ओ ह अपन 40 डिसमिल के बाड़ी म खरीफ अऊ रबी मौसम म अलग-अलग प्रकार के साग भाजी फसल लगाथे। फेर ये पइत ग्राम सुराजी योजना के तहत ओ ल गर्मी के समय उद्यानिकी विभाग ले भिण्डी के एक किलो बीज अऊ वर्मी खाद, वर्मी बेड, अऊ कीटनाशक रोगनाशक दवाई मिलिस। वो ह बताइस कि गर्मी म लगे भिण्डी फसल ले आमदनी मिलना शुरू हो गए हे। ओ ह रोजेच 30-40 किलो भिण्डी 10-15 रूपिया प्रति किलो के दर ले बाजार म बेचत हे। एखर से ओ ल रोजाना 400 ले 500 के मुनाफा होवत हे। वो ह नरवा, गरूवा, घुरूवा, अउ बाड़ी योजना बर सरकार के आभार प्रकट करत कहिस कि एखर से छोटे किसान ल बहुत लाभ होए हे अऊ अपन छोटे बाड़ी ले घलोक ओ मन ह अच्छा आमदनी पावत हें।

लउछरहा..