रायपुर, मुख्यमंत्री श्री भूपेश बघेल ह स्वतंत्रता दिवस के मौका म आज इहां राजधानी रायपुर के कलेक्टोरेट गार्डन तीर टाऊन हॉल म ‘‘गढ़बो नवा छत्तीसगढ़‘‘ छायाचित्र प्रदर्शनी के शुभारंभ करिस। जनसंपर्क विभाग कोति ले आयोजित ये छायाचित्र प्रदर्शनी आगामी 21 अगस्त तक आयोजित होही। मुख्यमंत्री ह ये मौका म स्वतंत्रता संग्राम सेनानी डॉ. महादेव प्रसाद पाण्डेय ल शॉल श्रीफल भेंट करके ओ मन ल सम्मानित करिन। ये बेरा म रायपुर पश्चिम के विधायक श्री विकास उपाध्याय, महापौर श्री प्रमोद दुबे, इतिहासकार प्रो. रमेन्द्रनाथ मिश्र संग बहुत अकन गणमान्य नागरिक उपस्थित रहिन।
मुख्यमंत्री श्री बघेल ह प्रदर्शनी म स्वतंत्रता संग्राम म छत्तीसगढ़ के योगदान के संग गढ़बो नवा छत्तीसगढ़ थीम उपर आधारित सजीव छायाचित्र के अवलोकन करिन। ये छायाचित्र प्रदर्शनी म महात्मा गांधी के पहिली अऊ दूसर छत्तीसगढ़ प्रवास, छत्तीसगढ़ के प्रमुख स्वतंत्रता संग्राम सेनानी, अइसे गढि़न देश, सबो वर्ग के विकास के संकल्प, शिक्षा, स्वास्थ्य, सुपोषण अभियान, गढ़बो नवा छत्तीसगढ़, महिला सशक्तिकरण, हमर गौरव हमर रायपुर, सांस्कृतिक विरासत-हरेली, ब्लैक बोर्ड ले की-बोर्ड कोति, आदिवासी मन के साथी सरकार, ग्रामीण अर्थव्यवस्था ल मजबूती, किसान के मितान सरकार, जन-चौपाल, भेंट-मुलाकात, लोकवाणी म आधारित बोलत तस्वीर मन ल बहुत ही आकर्षक ढंग ले प्रदर्शित करे गए हे। आयुक्त जनसंपर्क श्री तारण प्रकाश सिन्हा ह प्रदर्शनी के बारे म विस्तार ले जानकारी दीन। मुख्यमंत्री श्री बघेल ये बेरा म रायपुर स्मार्ट सिटी लिमिटेड कोति ले नवा साज-सज्जा के संग टाउन हॉल भवन के लोकार्पण करिन। जनसंपर्क विभाग कोति ले आयोजित गढ़बो नवा छत्तीसगढ़ छायाचित्र प्रदर्शनी आमजन बर अवइया 21 अगस्त तक रोजेच भिनसरहा 10 बजे ले रात 8 बजे तक चलही।
