नारायणपुर, राज्य स्तरीय स्वतंत्रता दिवस समारोह म जिला के पोटाकेबिन के अबूझमाड़िया लइका मन मलखम्ब के प्रस्तुति देहीं। आन कार्यक्रम मन के संग मलखम्ब घलोक आकर्षण के केन्द्र होही। राज्य स्तरीय स्वतंत्रता दिवस समरोह छत्तीसगढ़ के राजधानी रायपुर के पुलिस परेड ग्राउंड म आयोजित होही। आजादी के पर्व स्वतंत्रता दिवस म मुख्यमंत्री श्री भूपेश बघेल राजधानी रायपुर म आयोजित मुख्य समारोह म ध्वजारोहण करके परेड के सलामी लेहीं। स्वतंत्रता दिवस मुख्य समारोह म पोटाकेबिन के लइका मन के मलखम्ब के प्रदर्शन सामिल करे बर छत्तीसगढ़ के सामान्य प्रशासन विभाग कोति ले पुलिस महानिदेशक, छत्तीसगढ़ सशस्त्र बल ल लिखे हे।
ये साल फरवरी महिना म राजधानी रायपुर म आयोजित हॉफ मैराथन कार्यक्रम म जिला के ए अबूझमाड़िया लइका मन कोति ले शानदार प्रदर्शन करे गए रहिस। इहां बताना जरूरी हे कि पोटाकेबिन के ए अबुझमाड़िया लइका मन कोति ले राष्ट्रीय मलखम्ब प्रतियोगिता अहमदाबाद (गुजरात) अऊ सातारा (महाराष्ट्र) म घलोक शानदार प्रदर्शन करके मनखे मन के खूब ताली बटोरे गए हे अऊ टॉप फाइव म चौथा अऊ पांचवा स्थान प्राप्त करे हे। लइका मन ल मलखम्ब के प्रशिक्षण श्री मनोज प्रसाद, कॉन्सटेबल एसटीएफ नारायणपुर कोति ले दे जात हे। जिला मुख्यालय म आयोजित गणतंत्र दिवस अऊ स्वतंत्रता दिवस के समारोह म घलोक ए लइका मन कोति ले मलखम्ब के प्रदर्शन करके दर्शक मन के घलोक खूब तारीफ अऊ प्रशंसा पाय हे।
