केंद्रीय पूल म छत्तीसगढ़ ले चावल उपार्जन के अनुमति देहे केन्द्र ले करहीं आग्रह
रायपुर, मुख्यमंत्री श्री भूपेश बघेल के नेतृत्व म अवइया 13 नवम्बर के दिन प्रदेश के हजारों किसान मन सड़क के रद्दा ले दिल्ली बर रवाना होहीं। केन्द्र सरकार ले पहिली साल के जइसे ये साल घलोक केन्द्रीय पूल बर छत्तीसगढ़ ले चावल के उपार्जन करे के अनुरोध करहिं। मुख्यमंत्री श्री भूपेश बघेल ये बेरा म महाराष्ट्र, मध्यप्रदेश अऊ उत्तरप्रदेश म किसान मन के बड़े सभा मन ल सम्बोधित करहीं। मुख्यमंत्री श्री भूपेश बघेल ह किसान संगठन अऊ किसान, व्यापारी अऊ खेती किसानी ले जुड़े कई ठन संगठन मन ले सेन्ट्रल पूल म चावल खरीदी के संबंध म प्रधानमंत्री ल चिठ्ठी लिखे के आग्रह करिन। किसान मन ले आय चिठ्ठि मन ल ट्रक म रखके काफिला के संग दिल्ली ले जाय जाही, जऊन ल प्रधानमंत्री ल सौंपे जाही।
मुख्यमंत्री श्री बघेल छत्तीसगढ़ ले दिल्ली जाते समय रद्दा म परइया राज्य मन म बहुत अकन किसान सभा मन ल घलोक सम्बोधित करहीं अऊ छत्तीसगढ़ म किसान मन के हित बर करे जात काम मन के जानकारी दिही। ओ मन छत्तीसगढ़ के किसान मन के हित म सेंट्रल पूल म 32 लाख मीटरिक टन चावल के खरीदी के संबंध म पक्ष रखत उंखर से समर्थन लेहीं। प्रदेश के राजनीतिक दल मन के बैठक म सबो दल मन ह राज्य सरकार के 2500 रूपिया म धान खरीदी अऊ केन्द्रीय पुल म धान खरीदी के समर्थन देहे हें। किसान संगठन अऊ किसान मन ह घलोक सरकार के पक्ष के संग सहमति व्यक्त करे हें।
आप मन जानतेच हव कि प्रधानमंत्री श्री नरेन्द्र मोदी के नेतृत्व म केन्द्र सरकार ह साल 2014 म लेहे गए निर्णय के मुताबिक जऊन राज्य सरकार किसान मन ल समर्थन मूल्य म धान खरीदी म बोनस देही उंखर से सेन्ट्रल पूल म चावल नइ ले जाए। फेर एखर बावजूद छत्तीसगढ़ म पहिली दू बछर म ये प्रावधान ल शिथिल करके सेन्ट्रल पूल म छत्तीसगढ़ ले चावल ले गीस। एला देखत छत्तीसगढ़ सरकार कोति ले साल 2019-20 म सेन्ट्रल पूल म प्रधानमंत्री ले प्रावधान ल शिथिल करके सेन्ट्रल पूल म छत्तीसगढ़ ले 32 लाख मीट्रिक टन चावल लेहे के आग्रह करे हें, काबर के ये साल धान के जादा आवक के संभावना हे। ये संबंध म प्रधानमंत्री अऊ केन्द्रीय खाद्य मंत्री ल पत्र घलोक लिखे गए हे, फेर उहां ले असहमति के पत्र भेजे गीस, जेमां लिखे हे कि 2500 रूपिया प्रति क्विंटल म धान खरीदी ले बाजार अव्यवस्थित हो जाही।
मुख्यमंत्री श्री भूपेश बघेल ह कहिन कि छत्तीसगढ़ म 2500 रूपिया प्रति क्विंटल म धान खरीदी ले बाजार फले-फूले हे। किसान मन के हित म छत्तीसगढ़ सरकार ये साल घलोक किसान मन ले 2500 रूपिया प्रति क्विंटल म धान के खरीदी करही। ये साल करीबन 85 लाख मीट्रिक टन धान खरीदी होए के अनुमान हे। मुख्यमंत्री ह कहिन कि साल 2018-19 म हमन किसान मन ले 2500 रूपिया प्रति क्विंटल म धान खरीद के किसान मन ले करे गए वादा पूरा करे हन। ये साल घलोक 2500 रूपिया प्रति क्विंटल म धान के खरीदी करबोन। उमन छत्तीसगढ़ के सबो सांसद, किसान मन अऊ व्यापारी मन ले आग्रह करे हें कि ओ मन किसान मन के हित म प्रधानमंत्री ल चिट्ठी लिखव कि केन्द्र सरकार प्रावधान ल शिथिल करत ये साल सेन्ट्रल पूल म छत्तीसगढ़ ले 32 लाख मीट्रिक टन चावल के उपार्जन करे के अनुमति देवय।
