मुख्यमंत्री मनवा कुर्मी क्षत्रिय समाज के 74वां अधिवेशन म होइन सामिल
रायपुर, मुख्यमंत्री श्री भूपेश बघेल ह कहिन हे कि मनवा कुर्मी समाज प्रदेश के आन समाज के जइसे खेती उपर निर्भर हे। कहूं समाज ल आगू बढ़ाना हे त, शिक्षा अऊ स्वास्थ्य के प्रति विशेष रूप ले ध्यान देना होही। स्वस्थ शरीर म स्वस्थ मन के वास होथे। मुख्यमंत्री आज बेमेतरा जिला के बेरला ब्लाक के तीर बहेरा लिमाही चौक म छत्तीसगढ़ मनवा कुर्मी क्षत्रिय समाज के धमधा राज के 74वां वार्षिक अधिवेशन ल संबोधित करत ये विचार व्यक्त करिन। ये बेरा म मुख्यमंत्री ह स्वामी आत्मानंद के प्रतिमा के अनावरण तको करिन।
मुख्यमंत्री ह कहिन कि एक दिसम्बर ले समर्थन मूल्य म धान खरीदी के काम शुरू हो जाही। 2500 रूपिया प्रति क्विंटल म खरीदी होही। किसान मन के मन म कोनो बात के संशय नइ होना चाही, कि पूरा दाम मिलही या नहीं। मुख्यमंत्री श्री बघेल ह कहिन कि केन्द्र ल चिट्ठी लिखे हन कि 2500 प्रति क्विंटल म धान खरीदी होवय केन्द्र के कहना हे कि कहूं छ.ग. म किसान मन ले 2500 रूपिया प्रति क्विंटल के मान ले धान खरीदहू त प्रदेश के चावल नइ लेवन। कहूं केन्द्र चावल नइ खरीदही त चावल खराब होए के आशंका हे। अन्न के अपमान बर्दाश्त नइ होही। आधा चावल पीडीएस दुकान ल जात हे आधा चावल केन्द्रीय पुल म। छत्तीसगढ़ म हर हाल म किसान मन के खाता म 2500 रूपिया पहुंचही। श्री बघेल ह कहिन कि मै एक किसान के बेटा आंव, किसान मन के दरद समझथंव।
मुख्यमंत्री ह करिन पैरा दान करे के अपील
अधिवेशन ल संबोधित करत मुख्यमंत्री ह मनखे मन ले गौठान बर पैरा दान करे के आव्हान करिन। उमन कहिन कि खेत म पैरा ल जलाए ले धरती के उर्वरा शक्ति कम हो जाथे। धान के अपशिष्ट ले हम वर्मी कम्पोस्ट अऊ खाद बना सकत हन। एखर से फसल के उत्पादन बाढ़ही। उमन गौठान योजना के संबंध म कहिन कि ये योजना म सरकार के संगें-संग ये मां गांव वाले मन के घलोक सहभागिता हे। प्रदेश सरकार हर एक गौठान समिति मन ल प्रति महिना 10-10 हजार रूपिया प्रदान करही।
गृहमंत्री श्री ताम्रध्वज साहू ह कहिन कि कोनो मनखे बड़े ले बड़े पद म पहुंच जाय तभो हमला अपन संस्कार नइ भूलना चाही। आज लइका मन ल शिक्षा के संगें-संग संस्कार देहे के बहुतेच जरूरत हे। बड़े मन के आदर सम्मान करना हमर प्राचीन संस्कृति अऊ परम्परा हे। गृहमंत्री ह कहिन कि मुख्यमंत्री कोति ले प्रदेश के तीज-तिहार म अवकाश घोषित करके छत्तीसगढ़ के संस्कृति ल जीवित अऊ संरक्षित रखे के उदीम करे गए हे। राज्य सरकार कोति ले डॉ. नरेन्द्र देव वर्मा के लिखे अरपा पैरी के धार महा नदी हे अपार….. ल राजगीत घोषित करे गए हे। गृहमंत्री ह सामाजिक अधिवेशन के आयोजन म प्रसन्नता व्यक्त करत अपन शुभकामना दीन। विधायक श्री छाबड़ा ह कहिन कि मनवा कुर्मी क्षत्रिय समाज के आज 74 वां अधिवेशन हे। ये हम सब बर गौरव के घलोक विसय हे। जेमां मुख्यमंत्री खुद उपस्थित होए हें। उमन कहिन कि श्री भूपेश बघेल ह छत्तीसगढ़ी तीज-तिहार के परम्परा ल कायम रखे बर अवकाश घोषित करे हें। विधायक ह कहिन कि ममतामयी बिंदेश्वरी देवी के नाम म बेरला म भवन बनाए जाही।
मुख्यमंत्री ह जनभावना के मुताबिक भिंभोरी ल उप तहसील के दर्जा देहे के घोषणा करे हें। अंचल के मनखे मन मुख्यमंत्री के एखर बर आभार प्रकट करिन। ये बेरा म साहित्यकार डॉ. परदेशी राम वर्मा अउ समाज प्रमुख डॉ. रामकुमार सिरमौर ह घलोक अपन विचार व्यक्त करिन। सामाजिक भवन बर ग्राम पंचायत भालेसर के सरपंच श्रीमती देवकुमारी वर्मा ह मुख्यमंत्री ल एक लाख 21 हजार रूपिया के चेक भेंट करिस। ये बेरा म विधायक बेमेतरा श्री आशीष कुमार छाबड़ा, जिला पंचायत अध्यक्ष श्रीमती कविता साहू, कलेक्टर श्रीमती शिखा राजपूत तिवारी, पुलिस अधीक्षक श्री प्रशांत ठाकुर, अध्यक्ष बबला वर्मा संग गणमान्य नागरिक उपस्थित रहिन।
