मंत्री मन के कट्ठल के हंसई झन होजय 2018 म भाजपा के रोवई

छत्तीसगढ़ विधानसभा चुनाव 2018 के बाजा छत्‍तीसगढ़ म बाजे लगे हे। पाछू 15 बछर ले इहां भाजपा के रमनसिंह ल हरा पाना कांग्रेस बर संभव नइ रहे हे। ए पइत भाजपा बर कांग्रेस के संगें संग जोगी कांग्रेस के चुनौती घलव हे। जानकार मन के कहना हे के, राज्य म पाछू पंद्रा बछर ले भाजपा के सरकार तो बने हे फेर चुनाव मन म कांग्रेस अऊ भाजपा ल मिले वोटों के अंतर बहुत जादा नइ हे। राज्य म चलत क्षेत्रीय गुटबाजी, पार्टी के बीच नेता मन के असंतोष अउ जोगी कांग्रेस के दबदबा के संती ए पइत के चुनाव परिणाम पलट घलोक सकत हे।
छ्त्तीसगढ़ के राजनीति के सबले बड़का कूटनीतिज्ञ अजीत जोगी, आदिवासी अऊ दलित मतदाता मन ल लुभाए म लगे हे। पाछू पांच बछर ले अजीत जोगी राज्य म सरलग दौरा करत हे अऊ जनता के बीच जाके मनखे मन के समस्या मन ल सुलझात हें। हम आप ल सुरता देवा देवन के छत्तीसगढ़ के 90 विधानसभा सीट मन म ले 39 सीट आरक्षित हे। एमां 29 अनुसूचित जनजाति वर्ग बर आरक्षित हे। जोगी आदिवासी वर्ग ले आथे अउ वो ह ए सीट मन म अपन अच्छा प्रभाव जमाए हे।


(adsbygoogle = window.adsbygoogle || []).push({});

एती कांग्रेस के पोटा, अपन पार्टी के नेता मन ल सम्‍हाले म कांपत हे, अड़बड़ झन टिकिट पाए के आसा म बइठें हें। ए पइत छत्तीसगढ़ म जम्‍मो बड़का फैसला सीधा दिल्ली के आदेस म होवत हे। ए खातिर भीतर-भीतर असंतोष सुलगत हे। जउन मन ल कांग्रेस के टिकिट नइ मिल पाय उमन भीतरघात नहीं त सोझे बगावत करहीं अइसे दिखत हवय। वेब दुनिया के कहंउक कांग्रेस के बड़े नेता भूपेश बघेल, टीएस सिंहदेव अऊ चरणदास महंत, तीनों के नजर मुख्यमंत्री के कुर्सी म हवय। येमन अपन-अपन गुट ल मजबूत करे बर अपन समर्थक मन ल लामबंद करत हें।
एसो अड़बड़ दिन ले उहीच सरकार ल देखत जनता असकटा घलो गए हे। ये खातिर भाजपा बर एंटी इनकंबेंसी सबले बड़े मुद्दा हे। अमित शाह कोति ले करवाए गए सर्वे म अभी हाले के विधायक मन के रिपोट कार्ड खराब हे, ऊंखरेच क्षेत्र म उंखर विरोध सबले जादा हे। कहूं शाह के ‘चेहरा बदलो, चुनाव जीतो’ फार्मूला म प्रदेश भाजपा चलही त अभी हाल के कई विधायक मन के टिकट कट सकत हे। अइसे म ये मन बागी बनके पार्टी बर परेशानी खड़ा कर सकत हें। कुल मिला के भाजपा बर घलव ये बखत के सत्‍ता भोभला के चना बन सकत हे। इहां के मंत्री मन के बिकटे के कमई के मुद्दा अउ अभीन के अटल जी के अस कलस के बेरा म भाजपा के दू झिन मंत्री मन के कट्ठल हंसई, ठिठोली करत दू घरी के वीडियो भाजपा के मंत्री मन के इजियत ल उतार देहे हे। अकेल्‍ला रमन सिंह के स्‍वच्‍छ छवि कतकाच ल सम्‍हार पाही।


(adsbygoogle = window.adsbygoogle || []).push({});

Related posts