छत्तीसगढ़ म दूसर चरण के मतदान रहिस शांतिपूर्ण, करीबन 72 फीसदी होइस वोटिंग

छत्तीसगढ़ के अवइया मुख्यमंत्री कोन होही अऊ राज्य म काकर सरकार बनही, राज्य के जनता ह ए जम्‍मो सवाल मन के जवाब ईवीएम म बंद कर दीस। 20 तारीक के दिन राज्य के 19 ज़िला मन के 72 विधानसभा सीट मन बर दुसर अऊ आखरी चरण के मतदान होइस अऊ बम्पर मतदान होइस। कुल मिला के राज्य म 74 फीसदी पोलिंग होए हे। नक्सली मन के धमकी अऊ चुनाव रोके के सबो उदीम के बाद घलोक 74 फीसदी मतदान ये साफ़ बतावत हे के मनखे मन के भरोसा बुलेट म नहीं बैलेट म हे।
राज्य म पाछू के चुनाव मन म मुख्यत: बीजेपी अऊ कांग्रेस के बीच ही मुकाबला होत रहिस। फेर ए पइत के चुनाव म अजीत जोगी के पार्टी जनता कांग्रेस छत्तीसगढ़ (जे) अऊ बीएसपी गठबंधन के सेती कुछ सीट मन म त्रिकोणीय मुकाबला रहिस। पहिली चरण म नक्सल प्रभावित 18 सीट मन बर 12 नवंबर के दिन मतदान होइस। पहिली चरण म 76 फीसदी ले जादा मतदाता मन ह अपन मताधिकार के प्रयोग करे रहिन। कुल मिलाके राज्य म मतदान पूरा हो गीस अऊ अब सबके नजर 11 दिसंबर के दिन होवइया मतगणना म हे के जनता काखर भाग के फैसला करथे।

Related posts