प्रदेश म आज मनाए जाही संविधान दिवस

रायपुर, संविधान दिवस आज सोमवार 26 नवंबर के दिन छत्तीसगढ़ म घलोक मनाए जाही। ए अवसर म राजधानी रायपुर के अटलनगर स्थित मंत्रालय (महानदी भवन) म अभी 11 बजे पिरामिड गेट नंबर-बी म सबो विभाग मन के मंत्रालयीन अधिकारी अऊ कर्मचारी भारत के संविधान के प्रस्तावना (उद्देशिका) ल सामूहिक रूप ले पढ़हीं। सामान्य प्रशासन विभाग ह सबो अपर मुख्य सचिव, प्रमुख सचिव, सचिव अऊ विशेष सचिव मन ल ए सिलसिला म परिपत्र जारी करे हे अऊ सबो अधिकारी मन अउ कर्मचारी मन ल कार्यक्रम म सामिल होए के निर्देश दीए हें। मुख्य सचिव श्री अजय सिंह प्रस्तावना के वाचन करहीं। इही कड़ी म प्रदेश के स्कूल-कॉलेज, आश्रम-शाला मन अऊ छात्रावास मन म घलोक भारतीय संविधान के प्रस्तावना सामूहिक रूप ले पढ़े जाही। रायपुर संभाग के कमिश्नर श्री जी.आर. चुरेन्द्र ह संभाग के जम्‍मो जिला कलेक्टर मन अऊ जिला पंचायत के मुख्य कार्यपालन अधिकारी मन ल ए परिपत्र भेजे हे।

भारतीय संविधान के प्रस्तावना ए प्रकार हे – हम भारत के मनखे, भारत ल एक सम्पूर्ण प्रभुत्व-सम्पन्न, समाजवादी, पंथनिरपेक्ष अऊ लोकतंत्रात्मक गणराज्य बनाए बर अउ ओखर जम्‍मो नागरिक मन ल सामाजिक, आर्थिक अऊ राजनैतिक न्याय, विचार, अभिव्यक्ति अऊ अवसर के समानता देवाए बर अउ उन सब म मनखे के गरिमा अऊ राष्ट्र के एकता अऊ अखण्डता सुनिश्चित करे वाले बंधुता बढ़ाए बर दृढ़ संकल्प होके अपन ए संविधान सभा म आज तारीक 26 नवंबर 1949 ई. (मिति मार्गशीर्ष शुक्ल सप्तमी, सम्वत् दू हजार छह विक्रमी) ल एतद् ले संविधान ल अंगीकृत, अधिनियमित अऊ आत्मार्पित करत हवन।

Related posts