प्राधिकरण ले आदिवासी क्षेत्र मन के विकास म आही तेजी – मुख्यमंत्री श्री भूपेश बघेल

मध्यक्षेत्र आदिवासी विकास प्राधिकरण के पहिली बैठक होइस

रायपुर, मुख्यमंत्री श्री भूपेश बघेल के मुख्य आतिथ्य अऊ प्राधिकरण के अध्यक्ष श्री लालजीत सिंह राठिया के अध्यक्षता म आज इहां मुख्यमंत्री निवास कार्यालय म मध्यक्षेत्र आदिवासी विकास प्राधिकरण के पहिली बैठक आयोजित करे गीस। मुख्यमंत्री ह बैठक म कहिन कि पहिली प्रदेश म आदिवासी क्षेत्र मन के विकास बर सिरिफ दू बस्तर अऊ सरगुजा विकास प्राधिकरण रहिस। बस्तर अऊ सरगुजा विकास प्राधिकरण के सम्मिलित जिला मन के अकतहा शेष आदिवासी उपयोजना क्षेत्र के विकास के अल्पकालिक अऊ दीर्घकालिक योजना मन के निर्माण, क्रियान्वयन के समीक्षा बर मध्यक्षेत्र आदिवासी विकास प्राधिकरण के गठन करे गए हे। मध्यक्षेत्र आदिवासी विकास प्राधिकरण के अंतर्गत सम्पूर्ण राजस्व जिला कोरबा के अकतहा गरियाबंद, धमतरी, महासमुंद, बलौदाबाजार-भाटापारा, बालोद, राजनांदगांव, कबीरधाम, मुंगेली, बिलासपुर, रायगढ़ अऊ जांजगीर-चांपा के आदिवासी उपयोजना क्षेत्र म सम्मिलित क्षेत्र सामिल हे। ये प्राधिकरण के गठन ले आदिवासी क्षेत्र मन के विकास म तेजी आही।

बैठक म बताइए गीस कि मध्यक्षेत्र आदिवासी विकास प्राधिकरण म सामिल समस्त 12 जिला मन म वित्तीय साल 2018-19 म करीबन 20 करोड़ रूपिया के स्वीकृत राशि ले 419 विकास अऊ निर्माण काम संचालित हे। एमां ले अभी हाल म 14 करोड़ रूपिया के राशि के 286 काम मन ल पूरा कर ले गए हे। ये दौरान चर्चा करत मध्यक्षेत्र आदिवासी विकास प्राधिकरण के जिला के अतंर्गत चिन्हाकित गांव मन के सूची संबंधित सांसद अऊ विधायक मन ल उपलब्‍ध कराए बर निर्देशित करे गीस। बैठक म प्राधिकरण के अध्यक्ष श्री लालजीत सिंह राठिया अऊ उपाध्यक्ष डॉ. लक्ष्मी धु्रवे अऊ श्री पुरूषोत्तम कंवर ह घलोक संबोधित करिन। जेमां उमन बताइन कि ए गठन ले आदिवासी उपयोजना क्षेत्र मन म विकास ल अऊ गति मिलही। एखर से प्राधिकरण के अंतर्गत आदिवासी क्षेत्र अऊ ग्रामीण अर्थव्यवस्था बर अति जरूरी काम अऊ आदिवासी मन के संस्कृति के परिरक्षण बर जरूरी सबो काम लेहे जा सकही।

बैठक म प्राधिकरण के अंतर्गत संचालित काम मन के प्रगति, वित्तीय साल 2019-20 बर प्राधिकरण मद ले मिले बजट प्रावधान अऊ नवा प्रस्ताव मन के स्वीकृति आदि विषय उपर चर्चा करे गीस। चर्चा म आदिवासी क्षेत्र मन म शिक्षा, स्वास्थ्य, पेयजल व्यवस्था, जल संरक्षण, पशु सेवा अऊ कौशल उन्नयन विकास म विशेष जोर दे गीस। बैठक म जानकारी दिए गीस कि प्राधिकरण क्षेत्र म निवासरत अनुसूचित जनजाति मन के सामाजिक, सांस्कृतिक व आर्थिक हित मन के संरक्षण जइसे काम मन ल प्राथमिकता ले लेहे जाना हे। जनजाति विकास ले संबंधित नीति मन अऊ प्राथमिकता मन के मुताबिक क्षेत्रीय विकास बर उपाय अऊ जन आकांक्षा के मुताबिक विकास अऊ निर्माण काम मन ल लउहे स्वीकृत करके पूरा कराए जाना हे।

ये बेरा म पंचायत अउ ग्रामीण विकास मंत्री श्री टी.एस. सिंहदेव, स्कूल शिक्षा अऊ आदिमजाति कल्याण मंत्री डॉ. प्रेमसाय सिंह टेकाम, खाद्य मंत्री श्री अमरजीत भगत, महिला अउ बाल विकास मंत्री श्रीमती अनिला भेंड़िया, राजस्व मंत्री श्री जयसिंह अग्रवाल, उच्‍च शिक्षा मंत्री श्री उमेश पटेल, राज्यसभा सांसद श्रीमती छाया वर्मा संग प्राधिकरण के सदस्य अऊ मुख्य सचिव श्री आर.पी. मण्डल, अपर मुख्य सचिव श्री अमिताभ जैन, मुख्यमंत्री के प्रमुख सचिव श्री गौरव द्विवेदी, प्रमुख सचिव पंचायत अउ ग्रामीण विकास श्री सुब्रत साहू, सचिव आदिम जाति विकास श्री डी.डी. सिंह अऊ संबंधित विभागीय अधिकारी उपस्थित रहिन।

लउछरहा..