मुख्यमंत्री ह पंडवानी गायिका श्रीमती तीजन बाई अउ श्री अनूप रंजन पाण्डेय ल दीन शुभकामना

रायपुर, मुख्यमंत्री श्री भूपेश बघेल ह छत्तीसगढ़ के प्रख्यात पंडवानी गायिका श्रीमती तीजन बाई ल पद्म विभूषण बर चुने जाय म हार्दिक बधाई अउ शुभकामना देवत कहिन के श्रीमती तीजन बाई छत्तीसगढ़ के सांस्कृतिक राजदूत हें, ओ मन छत्तीसगढ़ के पहिचान हें। हमला उंकर उपर गर्व हे।
मुख्यमंत्री ह कहिन के श्रीमती तीजन बाई ह महाभारत के कथा उपर आधारित छत्तीसगढ़ के लोक गीत-नाट्य के विशिष्ट शैली पंडवानी ल न केवल देश म भलुक अन्तर्राष्ट्रीय स्तर म विशिष्ट पहिचान अऊ प्रसिद्धि देवाए हें। श्रीमती तीजन बाई ह छत्तीसगढ़ के समृद्ध कला अउ संस्कृति ल अऊ जादा समृद्ध बनाए म अहम भूमिका निभाये हें।
एकरे संग मुख्यमंत्री श्री भूपेश बघेल ह आज इहां दूरभाष म बस्तर बैण्ड के संयोजक श्री अनूप रंजन पाण्डेय ल पद्म श्री सम्मान मिले के घोषणा म बधाई अऊ शुभकामना देहे हें। श्री बघेल ह कहिन के बस्तर के विविध पारम्परिक नाच मन ल जोड़के श्री पाण्डेय ह बस्तर बैण्ड के माध्यम ले जऊन काम करे हे, ओखर से इहां के लोक कला संस्कृति ल विशिष्ट पहिचान मिले हे।
मुख्यमंत्री ह श्री पाण्डेय ले दूरभाष म चर्चा करत कहिन के छत्तीसगढ़ के प्रसिद्ध कलाकार हबीब तनवीर से देखाय गए मार्ग म चलत श्री पाण्डेय ह रंगमंच अउ विविध कला क्षेत्र मन के माध्यम ले नूतन परयोग करे हें। उमन छत्तीसगढ़ी भाखा के संग -संग राज्य के आन बोली मन के माध्यम ले घलोक इहां के कला संस्कृति ल समृद्ध करे हें।

लउछरहा..