मुख्यमंत्री ह प्रसिद्ध लेखक अउ पर्यावरणविद अनुपम मिश्र के निधन म शोक प्रकट करिस

रायपुर, 19 दिसम्बर 2016। छत्तीसगढ़ के मुख्यमंत्री डॉ. रमन सिंह ह देश के सुप्रसिद्ध गांधीवादी चिंतक, लेखक अउ पर्यावरणविद अनुपम मिश्र के निधन म गहन शोक व्यक्त करिस। मिश्र जी के आज नई दिल्ली के अखिल भारतीय आयुर्विज्ञान संस्थान (एम्स) म निधन हो गीस। मुख्यमंत्री ह उंकर परिवार बर अपन संवेदना प्रकट करे हें। डॉ. रमन सिंह ह रायपुर म जारी शोक संदेश म कहे हे के श्री मिश्र ह देश म पर्यावरण के सुरक्षा अउ विशेष रूप ले तालाब मन के संरक्षण खातिर जन-जागरण म अपन पूरा जीवन लगा दीस। उमन ’आज भी खरे हैं तालाब’, ’राजस्थान की रजत बूंदे’ अउ ’हमारा पर्यावरण’ जइसे अपन महत्वपूर्ण पुस्तक मन के जरिए पानी अउ पर्यावरण बचाये बर लोगन मन के ध्यान आकर्षित करिन। वर्षा जल संचय (रेनवाटर हार्वेस्टिंग) के महत्व ल उमन अपन लेखनी के जरिए जन-जन तक पहुंचाईन। श्री अनुपम मिश्र ह आखरी सांस तक गांधी शांति प्रतिष्ठान नई दिल्ली म सेवा करत रहिन। उमन ल इंदिरा गांधी राष्ट्रीय पर्यावरण पुरस्कार अउ जमनालाल बजाज पुरस्कार सहित राष्ट्रीय स्तर के कई ठन पुरस्कार मन ले सम्मानित करे गए रहिस हे। डॉ. रमन सिंह ह स्वर्गीय श्री अनुपम मिश्र ल विनम्र श्रद्धांजलि अर्पित करे हें।

लउछरहा..