जशपुरनगर, कलेक्टर श्री निलेशकुमार महादेव क्षीरसागर ह बुधवार के दिन इंडोर स्टेडियम म दीया बार के निःशुल्क बैडमिंटन प्रशिक्षण शिविर के शुभारंभ करिन। ए अवसर म बैडमिंटन प्रशिक्षण पाए बर बड़ संख्या म लइका अऊ ऊंखर अभिभावक उपस्थित रहिन। कलेक्टर श्री निलेशकुमार महादेव क्षीरसागर ह प्रशिक्षण शिविर के शुभारंभ कार्यक्रम ल संबोधित करत कहिन कि लइका मन के नैसर्गिक प्रतिभा के विकास करना हमर असल उद्देश्य हे। लइका मन के रूचि के मुताबिक अलग-अलग विधा मन म निपुणता लाय बर ये आयोजन करे जात हे।
आज एही कड़ी म बैडमिंटन म रुचि रखइया लइका मन बर निःशुल्क प्रशिक्षण के आयोजन जिला बैडमिंटन संघ के संग करे जात हे। उमन सबो लइका मन ल पूरा मनोयोग ले बैडमिंटन खेले के गुर सीखे अउ अच्छा खिलाड़ी बने के आहवान करिन। उमन कहिन कि ये मां कोनो प्रकार के संसाधन म कमी नइ आवय। लइका मन के उत्साहवर्धन करत उमन कहिन कि बचपन सीखे के उमर होथे। लइका कोनो चीज ल जल्दी सीखथे। ओमां सीखे के क्षमता जादा होथे। ये खातिर हमर कोसिस हे कि लइका मन बर ए गर्मी के छुट्टी म विविध विधा मन ल सीखे-सीखाये के कार्यक्रम सरलग आयोजित करत रहन जेकर से लइका अपन प्रतिभा ल ए माध्यम ले निखार सकंय।
हम आप ल बता देवन के कलेक्टर के मार्गदर्शन म जिला बैडमिंटन संघ के संग 8 ले 14 साल आयु वर्ग बालिका अऊ बालक बर निःशुल्क बैडमिंटन प्रशिक्षण शिविर के आयोजन करे जात हे। प्रशिक्षण 1 मई 2019 ले 15 जून तक डिस्ट्रिक्ट इंडोर स्टेडियम बालक स्कूल तीर देहे जात हे। प्रशिक्षण भिनसरहा 8 बजे ले 9 बजे तक अऊ संझा 4 बजे ले 6 बजे तक निरधारित हे। बैडमिंटन प्रशिक्षक कु दिव्यानी सिया, हर्षवर्धन अऊ कुशाग्र गुप्ता मन दवत हें। ए अवसर म बैडमिंटन संघ के संजीव शर्मा, राजेन्द्र गुप्ता, डॉ अनुरंजन टोप्पो, सत्यप्रकाश तिवारी सरीन राज संग अभिभवक गण उपस्थित रहिन।
