सड़क दुर्घटना में कमी लाने बर जन जागरूकता जरूरी – कलेक्टर बालोद, जेन ल जल्दी हे तेन जावव

जिला सड़क सुरक्षा समिति के बइठका आयोजित

धमेन्‍द्र निर्मल के सार समाचार, कलेक्टर श्रीमती रानू साहू ह कहिन कि जिला म सड़क दुर्घटना म कमी लाने बर जनजागरूकता जरूरी हे। सड़क दुर्घटना में कमी लाने बर जिला मुख्यालय के संगे संग विकासखण्ड मुख्यालय अउ नगरीय निकाय म जनजागरूकता कैम्प आयोजित करे गइस। श्रीमती साहू ह आज संझा संयुक्त जिला कार्यालय के सभाकक्ष म आयोजित जिला सड़क सुरक्षा समिति के बइठका ल सम्बोधित करत रिहिसे। बइठका म पुलिस अधीक्षक श्री एम.एल.कोटवानी, अतिरिक्त पुलिस अधीक्षक श्री डी.आर.पोर्ते अउ अतिरिक्त जिला दण्डाधिकारी श्री ए.के.वाजपेयी उपस्थित रिहिन।



कलेक्टर ह कहिन कि दू चकिया वाहन चालक मन ल हेलमेट लगाए बर समझाए जाए। सड़क मन म दुर्घटनाजन्य जघा मन ल चिन्हे पहिचाने जाए अउ संकेतक बोर्ड लगाके लोगन मन ल सावचेत करे जाए। कलेक्टर ह सवारी बस मन के बेरा के नेत-घात ल उपलब्ध कराए के निर्देश जिला परिवहन अधिकारी ल दिस । उन मन जम्मो एस.डी.एम. ल निर्देशित करिन कि वो मन बेंवारस पशु मन के घेच म रेडियम पट्टा लगावयॅ। ये बेरा म एस.डी.एम. बालोद श्री हरेश मण्डावी, एस.डी.एम. गुण्डरदेही श्री आर.एस.ठाकुर, एस.डी.एम. डौण्डीलोहारा डॉ. प्रियंका वर्मा, उप पुलिस अधीक्षक श्री दिनेश सिन्हा, जिला परिवहन अधिकारी श्री रविन्द्र ठाकुर संग अउ आने आने संबंधित अधिकारी मन संघरे रिहिन।




चटकारा
यमराज:- कस रे बिसौहा तोर तो दिन  नइ पूरे हे कइसन जल्दी यमलोक आगेस ?
बिसौहा:- का हे, प्लेन के पौवा मारेेव ताहेन फटफटी मोर प्लेन कस उड़ाए लगिस महराज, जेन मोर आगू म आइस, सब ल राँई-छाँई करत बाढ़ेव, इंहे आके मोर
गाड़ी थमिस हे।
यमराज:‘- एकर ले आगू कोनो रद्दच नइए बेटा, जेन ल जल्दी रहिथे तेन सीधा इंहे पँहुचथे।

लउछरहा..