हर एक मजदूर अऊ किसान के श्रम के होही सम्मान: मंत्री गुरु रूद्र कुमार

  • ठेकेदार के चंगुल ले छूट के मजदूर मन के चेहरा म छलकिस खुसी

रायपुर, लोक स्वास्थ्य यांत्रिकी अउ ग्रामोद्योग मंत्री गुरु रूद्र कुमार ले आज नीर भवन म रमाकांत सिंह के उदीम ले कर्नाटक के चित्रदुर्ग जिला के ईटा-भट्टा ले छूटके आये मजदूर मन ह सौजन्य भेंट करिन। ये बेरा म मंत्री गुरु रूद्रकुमार ह कहिन कि हरेक मजदूर अऊ किसान मन के श्रम के सम्मान करे जाही। मुख्यमंत्री श्री भूपेश बघेल के नेतृत्व म राज्य सरकार मजदूर अऊ किसान मन के हित बर लोक कल्याणकारी योजना संचालित करत हे अऊ ओ मन ल योजना मन के माध्यम ले लाभान्वित करे अऊ ओखर जीवन स्तर ऊंचा उठाए बर राज्य सरकार कृत संकल्पित हे।

ये बेरा म मंत्री गुरु रूद्रकुमार ह कलेक्टर जांजगीर-चांपा ल ए सबो मजदूर मन ल पलायन नीति के तहत श्रम विभाग के योजना मन ले लाभान्वित करके रोजगार देवाए, लइका मन के उचित शिक्षा व्यवस्था कराए अऊ ओ मन ल सकुशल इंकर घर तक वापस भेजे के जरूरी कार्रवाई करे के निर्देश दीए हें। उन्‍हें छलपूर्वक पलायन कराए बर दोषी मनखे उपर सख्त ले सख्त कार्रवाई करे ल कहे हें। हम आप ल बता देवन के पाछू एक साल ले जांजगीर चांपा जिला के अकलतरा विधानसभा के मुलमुला ग्राम के 30 मजदूर मन के दल ल कर्नाटक के चित्रदुर्ग जिला के ईटाभट्टा म बंधक बना ले गए रहिन। सबो मजदूर मन ह ठेकेदार मन के चंगुल ले मुक्‍त होके मंत्री गुरु रूद्र ल धन्यवाद दीन अऊ अपन आपबीती बतात कहिन के आप मन के माध्यम अऊ राज्य सरकार के पहल ले हम सबो आज अपन घर सकुशल लहुटत हन। असंगठित कामगार मजदूर संघ के अध्यक्ष श्री आलोक पांडे के अगुवाई म मजदूर मन के दल लोक स्वास्थ्य यांत्रिकी मंत्री गुरु रूद्रकुमार ले मिले इहां आए रहिन। ये बेरा म सबो मजदूर मन ह प्रदेश के मुखिया श्री भूपेश बघेल अऊ मंत्री गुरु रूद्रकुमार ल अपन रिहाई ले खुश होके धन्यवाद ज्ञापित करके आभार व्यक्त करिन।

लउछरहा..