बस्‍तर के फिलिम दुनिया म मचाही धूम

अबूझमाड़ म रहइया मुरिया जनजाति के जीवनशैली ल अब जम्‍मो संसार के मनखे मन देखहीं। एखर बर बस्तर सागा नाम के फिलिम बनके तियार हे। ये फिल्म ल इंटरनेशनल गोवा फिल्म फेस्टिवल के वर्किंग कैटेगरी म चुने गए हे। फेस्टिवल बर चुने गए विश्व के 200 फिल्म मन म बस्तर सागा सामिल हे। सवा घंटा के ए फिल्म ल नारायणपुर के दिनेश नाग ह बनाए हे उन्‍हें वो ह ये फिलिम म हीरो के काम तको करे हे। दिनेश ह पाछू 15 बछर ले मुंबई म रहिके बॉलीवुड म काम करत हे। वो ह मुंबई म अपन संगी मन के आघू अबूझमाड़ के थीम उपर काम करे के प्रस्ताव रखिस। एखर बाद डायरेक्टर अमोल चौधरी ह येमा फिल्म बनाए बर तियार होगे। ये फिल्म ल अमोलेच ह प्रोड्यूस करे हे।
पत्रिका म छपे जगदलपुर के आकाश मिश्रा के भेजे खबर के मुताबिक इकर बाद रायपुर के रहवईया राज बंजारे ह फिल्म बर कहानी लिखिस, हम आप ल बता देवन के राज ह एफटीआई ले पास आउट हे। एकर पाछू करीबन तीन महीना के शूटिंग के बाद ये फिल्म तैयार हो गीस। पाछू साल होए गोवा फिल्म फेस्टिवल म ये फिल्म ल दुनिया के 200 वर्किंग कैटेगरी के फिल्म मन म सामिल करे गीस। आगू घलोक फिल्म ल इंटरनेशनल फिल्म फेस्टिवल म ले जाय के तियारी हे।
दिनेश के बॉलीवुड के सफर के बारे म बताथें के दिनेश नाग ह नारायणपुर के रामकृष्ण आश्रम म रहिके 12वीं तक के पढ़ाई करिस। एखर बाद दिनेश भिलाई के कल्याण कॉलेज म आइस अउ थियेटर ले जुड़ गे। वो ह नेशनल स्कूल ऑफ ड्रामा ले पास आउट अभिनेता मन के संग मिलीस अऊ भोपाल, दिल्ली जाके थियेटर करे लागिस। वो ह 2006 म मुंबई पहुंचिस, 2009 म ओ ल रजत कपूर के संग फंस गे रे ओबामा फिल्म म एक कॉमिक रोल करे के मौका मिलीस, जऊन हर ओ ल बॉलीवुड म पहिचान दीस। एखर ले पहिली ओ ह कुछ रोल फिल्म मन म करे रहिस। एखर बाद आई जॉली एलएलबी 2 म घलोक वो ह काम करे रहिस।
आदिवासी मन ह ये फिल्म म निभाये हें भूमिका
फिल्म म लीड रोल निभाये दिनेश नाग बताइस के फिल्म के हर सीन ल जीवंत अऊ अंतर्राष्ट्रीय सिनेमा के जइसे बनाए बर अबूझमाड़ के आदिवााी मन ल ही रोल देहे गे हे। फिल्म मुरिया बोली म रिलीज करे जाही। फेस्टिवल बर फिल्म ल अलग-अलग भाखा म सबटाइटल्ड करे जाही। फिल्म म दिनेश के संग अभिनेत्री के तौर म महाराष्ट्रीयन सिनेमा ले प्राजक्ता वाडे अऊ बाल कलाकार के रूप म माड़ के ही व्यास देव के अभिनय देखे ल मिलही।

लउछरहा..