नारायणपुर, 17वां लोकसभा आम चुनाव बर नारायणपुर जिला के सबो 125 मतदान केन्द्र समेत नक्सल प्रभावित अतिसंवेदनशील मतदान केन्द्र मन म बिना डर-भय के ग्रामीण मतदाता शांतिपूर्ण मतदान करिन। अन्दरूनी इलाका मन के मतदान केन्द्र मन म घलोक खासा उछाह के संग लाइन लग के मतदाता मन अपन मताधिकार के परयोग करिन। महिला मतदाता मन घलोक घर ले निकल के मतदान केन्द्र मन म लाईन लगाके अपन पारी के अगोरा करत नजर आइन। जिला के कलेक्टर श्री पी.एस.एल्मा ह उच्चतर माध्यमिक विद्यालय नंबर 48 म अपन मताधिकार के परयोग करिन।
बस्तर लोकसभा क्षेत्र बर आज सबो आयु वर्ग के मतदाता मतदान म उत्साहपूर्वक हिस्सा लीन। महिला मतदाता मन ह बताइन के बिहनिया-बिहनिया सूरूज के गरमी कम रहिस त वो मन अपन सबो घर के काम छोड़के लोकतंत्र के महापर्व म अपन भागीदारी अउ लोकतंत्र ल मजबूत करे बर अपन कर्तव्य समझ के मतदान करे आए रहिन। बिहनिया ले मतदान बर लाईन लगना शुरू हो गए रहिस। तेज धूप म घलोक मनखे अपन पारी के अगोरा करत लाइन म लगे रहिन। जिला के जादातर मतदान केन्द्र मन म पुरूष मन के बनिस्बत महिला मतदाता मन के लम्बा-लम्बा लाईन देखे ल मिलीस। उन्हें सियान महिला मतदाता मन के घलोक बनेच भीड़ देखे गीस।
कलेक्टर मन करिस मतदान
कलेक्टर श्री पी.एस.एल्मा ह उच्चतर माध्यमिक विद्यालय नंबर 48 म अपन मताधिकार के परयोग करिन। कलेक्टर श्री एल्मा करीबन साढ़े 8 बजे मतदान केन्द्र पहुंचके लाईन म लगके अपन पारी के अगोरा करिस अऊ मतदान करिस। मतदान के बाद कलेक्टर ह सेल्फी जोन म सेल्फी तको लीन। कलेक्टर अउ जिला निर्वाचन अधिकारी श्री पी.एस.एल्मा बिहनिया-बिहनिया शहर अउ शहर के तीर संवेदनशील मतदान केन्द्र माहका, पालकी, बिंजली, गुरिया, करलखा अऊ सिंगोड़ीतराई मतदान केन्द्र के अवलोकन करके उहां के जम्मो व्यवस्था के जायजा लीन। उहें दंतेवाड़ा कलेक्टर टोपेश्वर वर्मा ह अपन परिवार के संग मतदान केंद्र 83 चिंत्तालंका 2 में पहुंचके मतदान करिन।
जनप्रतिनिधि मन म छत्तीसगढ़ के आबकारी मंत्री कवासी लखमा ने सुकमा जिला की नागारास मतदान केंद्र क्रमांक 34 में पहुंचके अपन बोट डारिन। बस्तर ले कांग्रेस प्रत्याशी दीपक बैज ह सपरिवार लाइन में लगके चित्रकूट विधानसभा के नेगीरास मतदान केंद्र पहुंचके वोट डारिन। उन्हें बस्तर से बीजेपी प्रत्याशी बैदूराम कश्यप अउ पूर्व मंत्री केदार कश्यप ह घलव अपन अपन बूथ म मतदान करिन।
