लोकसभा निर्वाचन के पहिली चरण म काली बिरसपतवार के दिन बस्तर लोकसभा क्षेत्र बर शांतिपूर्ण मतदान पूरा होइस। जिला निर्वाचन कार्यालय ले मिले आखरी आंकड़ा के मुताबिक बस्तर संसदीय क्षेत्र के आठ विधानसभा क्षेत्र मन म 57 प्रतिशत मतदान होये हे। अभी सबो मतदान दल वापस नइ आए हें। काल भिनसरहा तक मतदान दल मन के पहुंचे बाद मतदान के ए आंकड़ा म बदलाव हो सकत हे।
बस्तर संसदीय क्षेत्र के आठ विधानसभा क्षेत्र मन म बनाए गए 1879 मतदान केन्द्र मन म पहुंचके मतदाता मन ह उछाह के संग मतदान करिन। बस्तर के शहरी अऊ ग्रामीण दुनों क्षेत्र मन म भिनसरहा ले गांव वाले मन वोट देहे बर पहुंचे लगे रहिन। स्कूल अऊ महाविद्यालय परीक्षा, शादी-बिहाव अऊ तेंदूपत्ता संग्रहण के बेरा होए के बाव घलव युवा ले लेके सियान मतदाता मन ह मतदान म बढ़चढ़ के हिस्सा लीन।
जिला निर्वाचन कार्यालय ले काली संझा 5 बजे तक मिले जानकारी के मुताबिक कोंडागांव विधानसभा क्षेत्र म 65 फीसदी, नारायणपुर विधानसभा क्षेत्र म 50 फीसदी, बस्तर विधानसभा क्षेत्र म 70.08 फीसदी, जगदलपुर विधानसभा क्षेत्र म 68 फीसदी, चित्रकोट विधानसभा क्षेत्र म 67 फीसदी, दंतेवाड़ा विधानसभा क्षेत्र म 43 फीसदी, बीजापुर विधानसभा क्षेत्र म 33 फीसदी अऊ कोंटा विधानसभा क्षेत्र म 30 फीसदी मतदान होये हे।
27 मतदान केन्द्र मन म महिला मन ह अऊ 9 मतदान केन्द्र मन म दिव्यांग मन ह कराइन मतदान
लोकसभा निर्वाचन बर बस्तर संसदीय क्षेत्र म 27 संगवारी मतदान केन्द्र मन म मतदान के पूरा कार्यवाही महिला कर्मचारि मन कोति ले पूरा करे गइस, उन्हें 9 दिव्यांग मतदान केन्द्र मन के जिम्मेदारी दिव्यांग मतदान अधिकारी मन ल सौंपे गए रहिस। महिला अऊ दिव्यांग मतदान अधिकारी मन ह बड़ सफलता के संग अपन जिम्मेदारि ल पूरा करत सफलतापूर्वक मतदान कराइन। एखरे संग 32 आदर्श मतदान केन्द्र बनाय गए रहिस। 255 मतदान केन्द्र मनम वेबकास्टिंग के संग मतदान के प्रक्रिया उपर निगरानी रखे गीस।
रिटर्निंग अधिकारी डॉ. तंबोली ह मतदाता मन के आभार मानिस
कलेक्टर अउ बस्तर संसदीय क्षेत्र के रिटर्निंग अधिकारी डॉ. अय्याज तंबोली ह पूरा बस्तर संसदीय क्षेत्र म शांतिपूर्ण मतदान पूरा होए म मतदाता मन के प्रति आभार व्यक्त करिन। उमन कहिन के मतदाता मन के लोकतंत्र के प्रति आस्था अऊ मतदान के प्रति ऊंखर उछाह के सेती बिना बाधा के मतदान पूरा होइस। डॉ. तम्बोली ह मतदान काम म लगे सबो अधिकारी अऊ कर्मचारी मन के प्रति घलोक आभार व्यक्त करिन।
