मुख्यमंत्री सुपोषण अभियान के तहत लगातार मेहनत करत आंगनबाड़ी कार्यकर्ता मन ह कायम करिन मिसाल
रायपुर, प्रदेश ल कुपोषण मुक्त करे बर मुख्यमंत्री श्री भूपेश बघेल कोति ले चलाये जात मुख्यमंत्री सुपोषण अभियान के जमीनी नतीजा मिले लगे हे। जिहां अच्छा काम होवत हे ओखर प्रशंसा खुद मुख्यमंत्री कोति ले करे जात हे। दुर्ग जिला के बटरेल आंगनबाड़ी केंद्र नंबर 1 अऊ 4 के पूरा कुपोषण मुक्ति के लक्ष्य ल प्राप्त करे बर मुख्यमंत्री ह केन्द्र के आंगनबाड़ी कार्यकर्ता अऊ सहायिका मन ल सम्मानित करे हें।
बटरेल आंगनबाड़ी केंद्र नंबर 1 अऊ 4 म सरलग मेहनत अऊ मानिटरिंग करके तीन लइका मन ल कुपोषण के दायरा ले बाहिर निकाले गए हे। एखर बर मुख्यमंत्री ह बटरेल म आयोजित कार्यक्रम म बटरेल नंबर 1 के कार्यकर्ता श्रीमती कौशल्या शर्मा अउ सहायिका श्रीमती डोमेश्वरी साहू अऊ बटरेल नंबर 4 के कार्यकर्ता श्रीमती शैलबाला कौशिक अउ सहायिका श्रीमती दीपिका साहू ल सम्मानित करिन। ए कार्यकर्ता मन अऊ सहायिका मन ह सुपोषण अभियान के अंतर्गत बहुत अच्छा काम करे हें। उमन न केवल कुपोषित लइका मन के पोषण के ध्यान रखे हें भलुक नियमित गृहभेंट आदि के माध्यम ले अभिभावक मन ल घलोक जागरूक करत हें ताकि ओ मन घर म घलोक लइका मन के उचित ख्याल रख सकयं।
जिला कार्यक्रम अधिकारी श्री विपिन जैन ह बताइस कि मुख्यमंत्री सुपोषण मिशन के अंतर्गत लइका मन ल एक्सट्रा सप्लीमेंट देहे जात हे। कुपोषित लइका मन ल गुड़ अऊ मूंगफली ले बने चिक्की देहे जात हे। 0 ले 3 साल तक के लइका मन के चिन्हारी करके ए मन ल विशेष रूप ले भोजन कराए जात हे। एखर बर व्यापक जनभागीदारी के संग काम करे जात हे। उमन बताइन कि व्हाटसएप के माध्यम ले नियमित रूप ले अधिकारी मन कोति ले सुपोषण अभियान के मानिटरिंग करे जात हे। मुख्यमंत्री बाल संदर्भ योजना के माध्यम ले घलोक स्वास्थ्य परीक्षण शिविर मन के आयोजन करे जात हे। एखर से जमीनी नतीजा बेहतर होवत हे।
