रायपुर, सचिव महिला अऊ बाल विकास विभाग श्री सिद्धार्थ कोमल परदेशी ह आज धरसींवा विकासखंड के ग्राम भनपुरी अऊ सांकरा के आंगनबाड़ी केंद्र मन के अऊ इहां संचालित मुख्यमंत्री सुपोषण अभियान के जांच करिस। भनपुरी आंगनबाड़ी केंद्र म लक्ष्य सुपोषण योजना अंतर्गत कुपोषित लइका मन बर जन सहयोग ले संचालित योजना के अवलोकन करके उमन हितग्राही मन के संग चर्चा घलोक करिन।
उमन आंगनबाड़ी केंद्र के स्कूल पूर्व अनौपचारिक शिक्षा अऊ महतारी जतन योजना अऊ रेडी टू ईट के गुणवत्ता के जांच घलोक करिन। लक्ष्य सुपोषण योजना अंतर्गत बहुत कम समय म भनपुरी सेक्टर म 29 गंभीर कुपोषित लइका मन म ले 2 लइका सामान्य श्रेणी म अऊ 8 लइका मध्यम श्रेणी म आ गे हे। ए सबो हितग्राही मन ले उमन चर्चा करके योजना के उपयोगिता के संबंध म घलोक जानकारी लीन। भनपुरी म वर्ल्डविजन कोति ले बनाए गए आंगनबाड़ी केंद्र के अवलोकन करके उहाँ के शौचालय ल लइका मन बर सुविधायुक्त बनाए के निर्देश घलोक दीन।
हम इहां बता देवन के लक्ष्य सुपोषण योजना के अंतर्गत जिला म 819 अति कुपोषित लइका मन ल लक्षित करे गए हे। जेमा ले पाछू एक महिना म 12 लइका पूरा सुपोषित हो गे हें अऊ 173 लइका मध्यम सुपोषण के श्रेणी म आ गे हे अऊ बांचे लइका मन के वजन घलोक 300 ले 500 ग्राम तक बाढ़े हे।
सचिव श्री परदेशी ग्राम साकरा म घलोक मुख्यमंत्री सुपोषण योजना अंतर्गत 15 ले 49 साल के एनिमिया पीड़ित महिला अऊ कुपोषित लइका मन ल देहे जात गरम जेवन व्यवस्था के जांच करिस।ओ गांव म 50 महिला 10 ग्राम ले कम हिमोग्लोबिन के एनीमिया पीड़ित हें। कुपोषित अऊ एनीमिया पीड़ित महिला मन रोजेच मंगल भवन म उपस्थित होके भोजन लेवत हें।
भोजन के मीनू के घलोक सचिव ह अवलोकन करिस अऊ स्वास्थ्य विभाग के एएनएम अऊ ग्राम के सरपंच ले ये विसय म विस्तार ले चर्चा करिन। जांच के समय उमन कुपोषित लइका मन ल गर्म भोजन घलोक परोसिन अऊ ऊंखर संग बइठके भोजन घलोक करिन। उपस्थित महिला मन ह मुख्यमंत्री श्री भूपेश बघेल कोति ले चालू करे गए ये योजना ल बहुत लाभकारी बताइन। जिला म मुख्यमंत्री सुपोषण अभियान के सफल संचालन बर कलेक्टर श्री एस भारती दासन अऊ मुख्य कार्यपालन अधिकारी जिला पंचायत श्री गौरव सिंह ल बधाई दीन।
आप मन जानतेच हव के अभी हाले म रायपुर जिला के 408 ग्राम पंचायत मन ले 397 पंचायत मन म मुख्यमंत्री सुपोषण अभियान के संचालन 2 अकटूबर ले करे जात हे स्वास्थ्य विभाग के आंकड़ा के मुताबिक 10 ग्राम ले कम हीमोग्लोबिन के 8535 महिला मन म ले पाछू एक महिना म ही 2604 महिला मन के हीमोग्लोबिन के प्रतिशत बाढ़े हे अऊ महिला मन अब एनीमिया पीड़िता के श्रेणी ले बाहिर हो गए हें।
