मुख्यमंत्री श्री बघेल ह ग्राम जंजगिरी निवासी बुजुर्ग श्री भरोसा राम ठाकुर के निधन म दुख प्रकट करिस

रायपुर, मुख्यमंत्री श्री भूपेश बघेल ह दुर्ग जिला के ग्राम जंजगिरी निवासी बुजुर्ग श्री भरोसा राम ठाकुर के उदुपहा सरग सिधारे म गहरा दुख प्रकट करिन हें। मुख्यमंत्री ह भगवान ले उंखर आत्मा के शांति अऊ ऊंखर परिजन ल ये दुख ल सहन करे के सामरथ देहे बर प्रार्थना करे हें। आप मन जानतेच हव के मुख्यमंत्री श्री भूपेश बघेल हर बछर दीपावली के दूसर दिन ग्राम जंजगिरी म आयोजित गौरी गौरा पूजा कार्यक्रम म भाग लेत रहिन, जिहां परंपरा मुताबिक सबो विध्न के नाश अऊ मंगल कामना बर स्वर्गीय श्री भरोसा राम ठाकुर ह मुख्यमंत्री ल सोंटा लगात रहिन। मुख्यमंत्री ह अपन शोक संदेश म कहे हें कि स्वर्गीय श्री भरोसा राम ठाकुर ले ऊंखर कई बछर के जुन्ना आत्मीय संबंध रहे हे, ओ मन हमार सम्मानीय बुजुर्ग रहिन। ओखर निधन मोर बर पारिवारिक क्षति हे।