छत्तीसगढ़ सुरक्षा बल अउ नक्सली मन के बीच कवर्धा म मुठभेड़

धर्मेन्‍द्र निर्मल के सार समाचार, छत्तीसगढ़ के कवर्धा जिला ले एक ठो बड़का खबर आवत हे। क्षेत्र म सुरक्षा बल के जवान अउ नक्सली मन के बीच मुठभेड़ होए हे। करीबन एक घंटा तक दूनों कोति ले रूक-रूक के फायरिंग होवत रिहिसे। जवानमन के जवाबी कार्रवाई ले हड़बड़ा के नक्सली मन मौका ले फरार होगे। जवान मन अभीन तक बेस कैंप म नइ पहुंचे हे। जवानमन के लहुटे के बाद अउ जादा जानकारी सामने आही। भोरमदेव इलाका म ये मुठभेड़ होइस हे।
मिले जानकारी के मुताबिक पुलिस ह भोरमदेव इलाका म नक्सली मन के होए के भनक पाए रिहिसे। करीबन 25 ले 30 नक्सली मन के खबर सुरक्षा बल ल मिले रिहिसे। सूचना पाके बिरस्पत के बिहिनिया एसटीएफ, सीएफ अउ जिला पुलिस के दल इलाका म खोजबीन खातिर निकलिन। उही बेरा भोरमदेव इलाका म नक्सली मन जवान मन उपर उदुपहा फायरिंग कर दिन। जवान मन के जवाबी कार्रवाई के बाद नक्सली मन मौका ले फरार हो गे।
जानबा होए हे के इलाका के खोजबीन म पुलिस ह इलाका ले नक्सली समान घलो पाए हे। कुछ नक्सली मन के घायल होए के तको खबर आए हवय। अभी फौरी तौर म सुरक्षा खातिर एक ठो पीछलग्गू दल रवाना कर दिए गे हे। फोर्स के लहुटे के पीछू अउ जादा जानकारी आगू आ पाही।

चटकारा:-
टूरा दाई ल परेशान कर डारे रिहिसे। दाई एक चटकन मारिस ते टुरा रोवत ददा तीरन गय। ददा खई खजानी लेके चुप करा दिस। अब टुरा ददा ल परेशान करे लगिस।
ददा एक मुटका घमाक ले लगाइस ते टुरा दाई तीरन जाथे। अब दाई खजानी दे दिस।
अइसे तइसे टुरा बिगड़ गै। अब दाई ददा दूनो मुड़ धरे रोवत हे।
जा ….. कहिस।

लउछरहा..