- धान खरीदी के लीन जायजा
- परखिन धान के गुणवत्ता
- किसान मन के सुविधा के ध्यान रखे के निर्देश
- किसान मन अऊ हमाल मन ले हालचाल पूछिन
रायपुर, मुख्यमंत्री श्री भूपेश बघेल किसान मन ले समर्थन मूल्य म धान खरीदी के आज पहिली दिन दुर्ग जिला के पाटन विकासखंड के सहकारी समिति औंधी, जामगांव (एम), तर्रा अऊ फुंडा पहुंचिन। उमन धान खरीदी के पहिली दिन धान खरीदी केन्द्र मन के निरीक्षण करिन। मुख्यमंत्री जब औंधी के धान खरीदी केंद्र पहुंचिन त उहां स्थानीय किसान श्री श्रोणित चंद्राकर के धान बिकत रहिस। मुख्यमंत्री ह किसान मन अऊ हमाल मनले मिलके उंखर हालचाल पूछिन। श्री बघेल ह किसान मन ले कहिन किसान मन बर खरीदी केंद्र मन म जरूरी सुविधा देखे आए हंव। सरकार किसान मन के सबो सुविधा मन के ध्यान रखही। किसान मन ह खुशनुमा माहौल म कहिन, मुख्यमंत्री जी हमर खरीदी के व्यवस्था देखे आए हें, ये देखके बहुत अच्छा लागत हे। मुख्यमंत्री ह जामगांव (एम) म किसान श्री तोखनलाल वर्मा के धान खुदे तौलिन। श्री बघेल ह धान ल रगड़के ओखर गुणवत्ता ल परखिन अऊ कहिन गुणवत्ता अच्छा हे।
मुख्यमंत्री ह ग्राम तर्रा अऊ फुंडा म धान खरीदी केन्द्र निरीक्षण के बेरा म किसान मन ले कहिन कि अभी किसान मन ले 1815 अऊ 1825 रूपिया म धान खरीदे जात हे। बजट म प्रावधान करके अउ योजना बनाके बांचे राशि किसान मन ल हस्तांतरित करे जाही। सरकार किसान मन के हित के पूरा ध्यान रखही। उमन ये बेरा म हमाल मन ले मुलाकात करिन अऊ ग्रुप फोटो घलोक खिंचवाइन।
मुख्यमंत्री ह उपस्थित अधिकारी-कर्मचारी मन ल धान खरीदी बर सबो जरूरी इंतजाम करे के निर्देश दीन। उमन कहिन कि किसान मन ल कोनो प्रकार के परेशानी झन होवय अऊ खरीदी केन्द्र मन म बहुत मात्रा म बारदाना उपलब्ध कराए जाए। मौका म उपस्थित कलेक्टर श्री अंकित आनंद ह मुख्यमंत्री ल व्यवस्था के जानकारी देवत बताइस कि टोकन दिए गए हे। धान खरीदी के व्यवस्था के लगातार मॉनिटरिंग होवत हे।
आप जानतेच होहू के राज्य के सबो जिला मन म धान के उपार्जन छत्तीसगढ़ राज्य सहकारी विपणन संघ (मार्कफेड) कोति ले करे जात हे। धान के खरीदी साल 2018-19 म संचालित एक हजार 995 खरीदी केन्द्र मन संग ये साल 2019-20 म चालू करे गए 33 नवीन केन्द्र मन म खरीदी करे जाही। प्रदेश म 48 मंडि मन अउ 76 उप-मंडि मन के प्रांगण के उपयोग पाछू खरीफ विपणन साल के अनुसार धान उपार्जन केन्द्र बर करे जाही।
अभी हाल खरीफ साल 2019-20 म प्रदेश के 19 लाख 56 हजार किसान मन ह पंजीयन करा लेहे हें, जऊन पाछू साल पंजीकृत किसान मन के संख्या 16 लाख 97 हजार ले दू लाख 58 हजार जादा हे। राज्य शासन कोति ले खरीफ विपणन साल 2019-20 के समय राज्य के किसान मन ले नगद अउ लिंकिंग म धान के खरीदी एक दिसम्बर ले 15 फरवरी 2020 तक करे जाही। खरीफ साल 2019-20 म प्रदेश के किसान मन ले धान खरीदी के सबले जादा सीमा 15 क्विंटल प्रति एकड़ लिंकिंग निरधारित करे गए हे। खरीफ साल 2019-20 म राज्य के किसान मन ले 85 लाख मैट्रिक टन धान उपार्जन अनुमानित हे।
मुख्यमंत्री ह जामगांव-एम म गौठान के व्यवस्था के बारे म किसान मन ले बातचीत करिन। उमन कहिन कि बहुत अकन किसान पैरा दान करत हे ये बहुत अच्छा बात हे। किसान मन के सहयोग ले गौठान के काम बहुत बेहतर होही।
