फोन म ब्लैकमेल करइया नाच सिखवइया ल पुलिस ह पकडि़स

राजधानी रायपुर के श्यामनगर इलाका म रहइया एक मनखे ल मध्यप्रदेश के कटनी पुलिस ह गिरफ्तार करे हे। बताथें के वो ह डांस सिखाए के काम करथे ओकर उपर आरोप हवय के वो ह एक अनजान मनखे मन ल फोन करके बदनाम करे के धमकी देत रहिस अउ पइसा के मांग करत रहिस। ओकर खिलाफ कटनी पुलिस ह करीब 1 महिना पहिली अपराध दर्ज करे रहिस। वो टूरा ह फरार रहिस पुलिस ल मिलत नइ रहिस। पुलिस साइबर सेल के मदद ले युवक के मोबाइल नंबर ल ट्रैस करके ओला रइपुर ले गिरफ्तार करिस।
पेपर ले मिले जानकारी के मुताबिक कटनी के माधव नगर निवासी सुशील मोटवानी ल कोनो अनजान युवक ह फोन करके बदनाम करे के धमकी दीस अऊ 40 हजार रूपिया के मांग करिस। तहां ले वो ह घेरी-बेरी फोन करके धमकी देहे लगीस अऊ पदोए लागिस। हक खा के वो ह थाना म ए घटना के रिपोट दर्ज कराईस। पुलिस ह जांच म पाइस के जऊन नंबर ले कॉल करे जात रहिस ओखर लोकेशन रायपुर म हे।
एखर बाद कटनी पुलिस वोला खोजत इहां पहुंचिस अऊ श्याम नगर म रहइया त्रिवेन्द्र यादव उर्फ गोलू ल गिरफ्तार करिस। आरोपी युवक ह पूछताछे म अपन जुरूम कबूल कर लेहे हे। पुलिस ओला गिरफ्तार करके कटनी ले गए हे।

लउछरहा..